بۆڕی سەرچاوەیەکی ئاوی ڕواندز بە مشار دەبڕدرێت

ئاڤا نیوز

یەکێک لە بۆرییەکانی سەرچاوەی ئاوی ڕواندز بە مشاری داربڕین بڕاوە و لێکۆڵیینەوە بۆ ئاشکرا کردنی بکەران دەستی پێکردووە.

چیرۆکی سەرەکی: شەوی ڕابردوو بۆریێکی سەرچاوەی ئاوی ڕواندز کە لە گەلی مێگری بناری چیای کۆڕەک ئاو بۆ ڕواندز دابین دەکات، بە مشاری داربڕین بڕاوە.

لێدوانی فەرمی: ئەحمەد قادر، قایمقامی قەزای ڕواندز بە ئاڤامیدیای گوت: شەوی ڕابردوو یەکێک لە بۆرییەکانی سەرچاوی ئاوی مێگر بڕاوە، تییمەکانی فەرمانگەی ئاو بۆرییەکەیان چاککردووەتەوە و دەستمان بە بەدواداچوون و لێکۆڵینەوە کردووە، بۆ دۆزینەوەی ئەو کەسەی بۆرییەکەی بڕیوە بۆ ئەوەی ڕێکاری یاسایی لە بەرامبەردا بگیرێتەبەر.

- لە ماوەی ڕابردوو هەڵمەتێکمان کردووە بۆ ڕێکخستنی تۆڕەکانی ئاو و بڕینی سەرپێچییەکان، گومان دەکرێت ئەو کەسانەی سەرپێچییەکانیان لابراوە ئەو کارەیان کردبێت.

زانیاریی زیاتر: ماوەی ڕابردوو لە سنووری قەزای ڕواندز لە هەڵمەتێکی فراواندا 200 سەرپێچی لەسەر تۆڕەکانی ئاوی قەزاکە لابران.

ئەوەی پێویستە بیزانیت: گەلی مێگر دەکەوێتە بناری چیای کۆڕەک، بە دوو بۆری یەکێکیان 10 ئینج و ئەوەی دیکەیان شەش ئینج، لەم گەلییەوە ئاو بۆ قەزای ڕواندز دابین کراوە.

ئەمەش بزانە: ئاوی قەزای ڕواندز لە دوو سەرچاوە دابین دەکرێت، سەرچاوەی سەرەکی لە بێخاڵەوە دێت و دووەمیان لە گەلی مێگر، هەردووکیان دەچنە سەر کۆگای سەرەکی، دواتر بۆ تۆڕەکانی ئاوی قەزاکە دەچێت.