وەزارەتی دەرەوەی سووریا: دەبێت چەک و دۆسیەی ئەمنی تەنیا لەدەستی دەوڵەتدا بێت

ئاڤا نیوز

وەزارەتی دەرەوەی سووریا ڕایگەیاند، هەندێک گرووپ لە پارێزگای سویدای باشووری وڵاتەکەیان ڕێگە نادەن هێزە ئەمنییەکان ئەرکی خۆیان بۆ کۆنتڕۆڵکردنی دۆخی ئەمنیی جێبەجێ بکەن، جەختیش دەکاتەوە لەسەر ئەوەی دیمەشق پێداگرە لەسەر ئەوەی چەک و دۆسیەی ئەمنی و سەربازیی وڵات دەبێت تەنیا لەدەستی دەوڵەتدا بێت.

چیرۆکی سەرەکی: چەند ڕۆژێکە شەڕ و پێکدادانێکی تووند لەنێوان گرووپە چەکدارە خۆجێیەکان لە گەڕەکی 'مەقوەس'ـی شاری سوەیدا و خێڵە بەدەوییەکانبەردەوامە، هەردوولا چەکی قورس وەک هاوەن، ئار بی جی و دۆشکەیان لە دژ یەک بەکارهێناوە.

ڕاگەیێنراوی فەرمی: وەزارەتی دەرەوەی سووریا لە ڕاگەیێنراوێکدا ئاماژەی بەوەشكردووە، بە نیگەرانییەوە چاودێری شەڕ و پێکدادانی ژمارەیەک گرووپی لە یاسا دەرچووی ناو پارێزگای سویدا و ژمارەیەک چەکداری ناوچە هاوسێکانی دەکەن، هەوڵی هێزە ئەمنییەکانیش بۆ کۆنتڕۆڵکردنی دۆخەکە بەردەوامە، بەڵام هەندێک لایەن دەیانەوێت پارێزگاکە بخەنەناو گێژاوی ئەمنیی و ڕێگری دەکەن دەزگا ئەمنییەکان بە ئەرکی خۆیان هەڵسن.

ئەوەشی خستووەتەڕوو، داوا لە هەمووان دەکەن دان بە خۆیاندا بگرن و خۆیان لەکاری توندوتیژانە بەدووربگرن، چەکی نایاسایی ڕادەستبکەن و ڕێگریی لە ئاژاوەنانەوە بکەن، جەختیش دەکەنەوە لەسەر ئەوەی چەک، دۆسیەی ئەمنیی و سەربازیی تەنیا دەبێت لە دەستی دەوڵەتدا بێت، بەوەش دەوڵەت یەکێتی خاکەکەی دەپارێزێت و ناهێڵێت هیچ ناوچەیەک ببێتەگۆڕەپانی ئاژاوە و هەژموونی دەرەکی، لەو پێناوەشدا داوا لە هەموو وڵاتان و ڕێکخراوەکان دەکەن خۆیان لە پشتیوانی هەموو بزووتنەوە هەڵگەڕاوە و جوداخوازەکان بەدووربگرن.