چارەسەری گرفتی كارەبای بیرەكانی ئاوی دەورووبەری شاری هەولێر دەكرێت

ئاڤا نیوز

بەڕێوەبەری ئاوی هەولێر ئاشكرای دەكات كە ئەگەر نەتوانرا كارەبای زیاتر بۆ بیرەكانی ئاوی دەورووبەری هەولێر دابین بكرێت، لە تەنیشت هەر بیرێك مۆلیدەیەك دادەنرێت و گرفتەكە چارەسەر دەكرێت.

چیرۆكی سەرەكی: لەگەڵ هاتنی وەرزی گەرما، گرفتی كەمیی كارەبا بۆ دانیشتووانی چەند ناوچەیەكی دەوروبەری شاری هەولێر دروست بووە ئەمەش بووەتە هۆی كەمبوونەوەی كاركردنی بیرەكانی ئاو كە لە ڕێگەی كارەباوە كار دەكەن، دامودەزگاكانی حكومەتی هەرێمی كوردستانیش لەسەر هێڵن بۆ چارەسەركردنی گرفتەكە.

لێدوانی فەرمی: ڕابەر حوسێن، بەڕێوەبەری ئاوی هەولێر بە ئاڤا میدیای ڕاگەیاند: ئەو گرفتەی كە ئێستا لە دەورووبەری هەولێر سەبارەت بە ئاوی خواردنەوە هەیە دەگەڕێتەوە بۆ كەمی كارەبا، چونكە ئەو ناوچانە بۆ ئاوی خواردنەوە پشت بە ئاوی بیرەكان دەبەستن و بیرەكانیش پێویستیان بە كارەبایە، بۆیە كەمی كارەباش گرفتی كەمیی ئاو دروست دەكات.

-بەهۆی ئەو بودجەیەی كە لەلایەن حكومەتی هەرێمی كوردستانەوە بۆ بەڕێوەبەرایەتییەكانی ئاو دابین كراوە، چارەسەركردنی گرفتەكان قۆناغی باشی بڕیوە.

-دامودەزگا پەیوەندیدارەكانی حكومەت لەسەر هێڵن بۆ ئەوەی چارەسەرێكی گونجاو بۆ گرفتی كارەبای ناوچەكانی دەوروبەری شاری هەولێر بدۆزنەوە، ئەگەر زانرا چارەسەرەكە دوادەكەوێت ئەوا ئێمە لەڕێگەی دانانی مۆلیدە لە تەنیشت بیرەكان گرفتەكە چارەسەر دەكەین و كارەبایان بۆ دابین دەكەین.

-بەهۆی پڕۆژەی فریاگوزاریی خێرای ئاوی هەولێر، ئەمساڵ هیچ بیرێك لە سەنتەری شاری هەولێر لێنەدراوە بەڵكوو ئەو بیرانەی لێدراون سەرجەمیان دەكەونە دەرەوەی شاری هەولێر.