عیزەت شابەندەر: دەبێت عێراق خۆی بۆ قۆناغی گەمارۆدان ئاماد بکات

ئاڤا نیوز

عیزەت شابەندەر، سیاسەتمەداری عێراق و نزیک لە سەرۆکوەزیرانی عێراق ئاماژە بەوە دەکات، شەڕی نێوان ئیسرائیل و ئێران کۆتایی نەهاتووە و دەبێت عێراق خۆی بۆ قۆناغی گەمارۆدان ئامادە بکات و ئەگەری هەیە پریشکی شەڕەکە و کاریگەرییەکانی بگاتە عێراق.

وێنە گەورەکە: لەکاتێکدا باس لە پلانی ئیسرائیل - ئەمریکی دەکرێت بۆ دەستپێکردنی ئۆپەراسیۆنی سەربازیی نوێ دژی ئێران ئەگەر واشنتن نەتوانێت لە چەند ڕۆژی داهاتوودا لەگەڵ تاران بگاتە ڕێککەوتنی ئەتۆمی، سیاسەتمەداران و بەشێک لە کەسایەتییەکانی عێراق باس لە هەڕەشە و مەترسییەکانی سەر عێراق دەکەن لە ئەگەری دروستبوونی شەڕ لە ناوچەکەدا.

لێدوانی فەرمی: عیزەت شابەندەر، سیاسەتمەداری عێراقی و نوێنەری پێشووی سوودانی بۆ سووریا لە چاوپێکەوتنێكی تەلەڤزیۆنی ڕایگەیاند: ئیسرائیل بە دوای چارەسەر و سەقامگیریی ناوچەکەدا ناگەڕێت، هێشتا شەڕی نێوان ئێران و ئیسرائیل بەردەوامە و کۆتایی پێ نەهاتووە، محەممەد شیاع سوودانی، سەرۆکوەزیران و سەرکردایەتی سیاسی دەبێت وا بیربکەنەوە کە گەمارۆیەکی تووند لە دەورووبەری عێراق دەسەپێندرێت و دەشڵێت، "پێویستە خۆمان بۆ قۆناغی گەمارۆدان ئامادە بکەین و پێی سەرسوڕمان نەبین".

ناوبرا وتیشی: ئەگەر پیلانگێڕی دژ بە عێراق سەرکەوتوو بێت، هیچ لایەک براوەیەک نابێت و قەوارەی زایۆنی (ئیسرائیل) بە سەقامگیری و یەکگرتوویی عێراق ئارام ناگرێت.

ئەوەی پێویستە بیزانیت: ئەم لێدوانە لە کاتێکدایە، ڕۆژی یەکشەممە، ڕۆژنامەیەکی ئیسرائیلی ئاشکرای کرد، ئیسرائیل لەڕێگەی ئەمریکاوە پەیامێکیان بۆ بەرپرسانی عێراق ناردووە، هەڕەشەی ڕاستەوخۆی کردووە ئەگەر گرووپە چەکدارەکان هێرشە بکەنە سەر ئیسرائیل ئەوا عێراق دەکرێتە ئامانج.