ئەمریکا: ئەم هێرشە درۆنییانە مایەی قبووڵکردن نین

ئاڤا نیوز

لەبارەی هێرشە درۆنییەکانی دوو ڕۆژی ڕابردوو بۆ سەر دوو کێڵگەی نەوتی لە هەرێمی کوردستان، باڵیۆزخانەی ئەمریکا لە بەغدا ڕایگێنراوێکی بڵاوکردەوە، دەڵێت: ئەم هێرشانە مایەی قبوڵکردن نین.

چیرۆکی سەرەکی: لەماوەی کەمتر لە 24 کاتژمێری ڕابردوودا چەند هێرشکی درۆنی کراوەتە سەر چەند ناوچەیەکی هەرێمی کوردستان، شەوی ڕابردوو دوو درۆنی بۆمبڕێژکراو ئاراستەی کێڵگەی نەوتی خورمەڵە لە سنووری هەولێر کران و هیچ زیانێکی نەبوو، بەرەبەیانی ئەمڕۆ سێشەممەش درۆنێک ئاراستەی کێڵگەی نەوتی سەرسنک کرا و بەهۆیەوە کۆمپانیای HKN ENERGYـی ئەمریکی کارەکانی لەو کێڵگەیە ڕاگرت. 

ڕاگەیێنراوی فەرمی: باڵیۆزخانەی ئەمریکا لە بەغدا ئەمڕۆ سێشەممە ڕایگەیاند: ئەمریکا ئەم هێرشانە شەرمەزار دەکات لە وانە هێرشەکانی 14 و 15ـی ئەم مانگە بۆ ژێرخانی نەوتی کێڵگەکانی خورمەڵە و سەرسنک لە هەرێمی کوردستان. پێویستە حکومەتی عێراق دەسەڵاتی خۆی بەکاربهێنێت بۆ ڕێگریکردن لە گرووپ و میلیشیا چەکدارەکان، ڕاگرتنی هێرشەکانیان بۆسەر ئەو شوێنانەی کۆمپانیا عێراقی و بیانییەکان وەبەرهێنانی تێدا دەکەن.

لە بەشێکی دیکەی ڕاگەیێنراوەکە هاتووە، ئەم هێرشانە جێگەی قبوڵکردن نین و سەروەری عێراق تێکدەدەن و زیان بە هەوڵەکان دەگەیەنن بۆ ڕاکێشانی وەبەرهێنانی بیانی. داوا لە حکومەتی عێراق دەکەین لێکۆڵینەوە لەو هێرشانە بکات و لێپرسینەوە لە بکەرانی هێرشەکان بکات و ڕووبەڕووی لێپرسینەوەیان بکات.

لەلایەکی دیکەوە: کونسوڵخانەی ئەمریکا لە هەولێر رایگەیاند، ئەمریکا سەرکۆنەی هێرشە درۆنییەکان دەکات و جێگەی قبووڵکردن نییە.