لەلایەن هێزێکی ئەمنییەوە بە زەبری هێز خێمەی خۆپیشاندەران لە کەرکووک هەڵگیرا

ئاڤا نیوز

لەلایەن فەرماندەیی ئۆپەراسیۆنە هاوبەشەكانی كەركووكەوە فەرمانی دەستگیركردن بۆ دوو لەو مامۆستایانە دەردەچێت كە ئەمڕۆ سەرپەرشتیی خۆپیشاندانەكەی شاری كەركووكیان كرد کە دژی خەرج نەکردنی مووچەکانیان لەلایەن بەغداوە بەڕێوەچوو.

 

چیرۆكی سەرەكی: وەك ناڕەزاییەك لەبەرامبەر خەرج نەکردن و دواكەوتنی مووچەكانیان لەلایەن بەغداوە، ئەمڕۆ سێشەممە 15-7-2025، مامۆستا و فەرمانبەرانی خوێندنی كوردی لە كەركووك لەبەردەم نووسینگەی پەرلەمانی عێراق لە كەركووك گردبوونەوە، بەڵام لەلایەن هێزێكی ئەمنییەوە كۆتایی بە خۆپیشاندانەکەیان هێنرا.

 

لێدوانی فەرمی: محەممەد جەلیل، نوێنەری مامۆستایانی ناڕازی لە كەركووك بە ئاڤا میدیای ڕاگەیاند: لەلایەن فەرماندەیی ئۆپەراسیۆنە هاوبەشەکانی كەركووكەوە فەرمانی دەستگیركردن بۆ من و هاوپیشەم (بارزان دەلۆ) دەرچووە، بەهۆی ئەوەی سەرپەرشتیی خۆپیشاندانەكەی ئەمڕۆمان كردووە.

 

زانیاریی زیاتر: دوای ئەوەی مامۆستا و فەرمانبەرانی بەشی خوێندنی كوردیی كەركووك خێمەی مانگرتنیان لەبەردەم نووسینگەی پەرلەمانی عێراق هەڵدا، لەلایەن هێزێكی ئەمنیی پارێزگاكەوە خێوەتەكە هەڵگیرا، بەمەش گرژی و ئاڵۆزی كەوتە نێوان هێزە ئەمنییەكە و بەشداربووانی خۆپیشاندانەكە.

 

لەلایەكی دیكەوە: چەند مامۆستایەكی بەشداربووی خۆپیشاندانەكە قسەیان بۆ ئاڤا میدیا كرد و ناڕەزاییان سەبارەت بە ڕەفتاری هێزە ئەمنییەكە دەربڕی و ئاماژەیان بە ئەوە دا كە لەلایەن هێزەكەوە بە شەق لێیان دراوە و ئازاریی زۆر دراون.