وادەی وەرگرتنی گەنمی جووتیارانی سنووری هەولێر درێژ دەکرێتەوە

ئاڤا نیوز

 

وەزارەتی بازرگانیی حکومەتی عێراق وادەی وەرگرتنی گەنمی جووتیارانی سنووری هەولێر و دیبەگە و گوێڕ بۆ ماوەی چوار ڕۆژ درێژ کردەوە.

 

لێدوانی فەرمی: میران بەختیار، بەڕێوەبەری بازرگانیی دانەوێڵەی هەولێر بە ئاڤا میدیای ڕاگەیاند: کاتژمێر 02:00ـی پاشنیوەڕۆی ئەمڕۆ، لەلایەن وەزارەتی بازرگانیی عێراقەوە وەڵامی نووسراوەکەمان بۆ درێژکردنەوەی وادەی وەرگرتنی گەنمی جووتیارانی سنوورەکە درایەوە، هەرچەندە داوای 10 ڕۆژمان کردبوو، بەڵام چوار ڕۆژ وادەکە درێژکراوەتەوە، واتە تاوەکو 19-7-2025، گەنم لە جووتیاران وەردەگیرێت.

 

-تاوەکو ئێستا 120 هەزار و 700 تۆن گەنمی جووتیارانی سنووری هەولێر وەرگیراوە.

 

-27 هەزار تۆن گەنمی جووتیارانی دیبگە و گوێر بە بڕیاری عێراق لە بەڕێوەبەرایەتیی بازرگانیی دانەوێڵەی هەولێر وەردەگیرێت، بەڵام تاوەکو ئێستا بڕێکی کەم لەو گەنمە وەرگیراوە، بۆیە نازانین لەو چوار ڕۆژەدا فریای وەرگرتنی هەمووی دەکەوین یان نا.

 

باکگراوند: ئەمساڵ حکومەتی عێراق بڕی 400 هەزار تۆن گەنمی جووتیارانی هەرێمی کوردستان وەردەگرێت.