هۆشیار زێباری: هێرشەکان و سیاسەتی برسیکردن دووژمنکارییەکی ئاشکران دژی کوردستان

ئاڤا نیوز

ئەندامێکی مەکتەبی سیاسیی پارتی دیموکراتی کوردستان، هێرشەکانی ئەم دواییەی "گرووپە وەلائییەکان" بۆ سەر دامەزراوە نەوتییەکان و فڕۆکەخانەکانی هەرێمی کوردستان، بە "دوژمنکارییەکی ئاشکرا" ناودەبات و ڕایدەگەیەنێت کە ئەم هێرشانە هاوکاتن لەگەڵ سیاسەتی "برسیکردنی ئابووری" و بڕینی مووچەی فەرمانبەران لەلایەن حکومەتەوە.

وێنە گەورەکە: ماوەیەکە هێرشە درۆنییەکان بۆسەر ژێرخانی وزەی هەرێمی کوردستان زیادییان کردووە. لە ڕابردوو دامەزراوە ئەمنییەکانی هەرێمی کوردستان گرووپە توندڕەوە عێراقییەکانیان بە جێبەجێکاری ئەو هێرشانە زانییوە.

پەیامی فەرمی: هۆشیار زێباری، ئەندامی مەکتەبی سیاسیی پارتی دیموکراتی کوردستان لە پۆستێکیدا لە تۆڕی ئێکس نووسیویەتی: لە ماوەی ڕۆژانی ڕابردوودا، گرووپە چەکدارە وەلائییەکان بە فڕۆکەی بێفڕۆکەوانی بۆمبڕێژکراو، ژمارەیەک دامەزراوەی نەوتی و فڕۆکەخانەکانی سلێمانی و هەولێریان لە هەرێمی کوردستان بۆردوومان کرد و زیانی ماددییان گەیاند.

لە هەمان کاتدا: زێباری نووسیویەتی: ئەم هێرشانە هاوکات بوون لەگەڵ بڕیارەکانی بڕینی مووچەی فەرمانبەران بۆ ماوەی 75 ڕۆژ و سیاسەتی برسیکردنی ئابووری لەلایەن حکومەتەوە. ئەمە دەستدرێژییەکی ئاشکرایە بۆ سەرمان لەلایەن هێزە لەیاسادەرچووەکانەوە.