چوارچێوەی هەماهەنگی گرووپە چەکدارە شیعییەکان لە هێرشکردنە سەر کێڵگە نەوتییەکانی کوردستان بێبەری دەکات

ئاڤا نیوز

چوارچێوەی هەماهەنگی کە هێزە سیاسییە شیعییە دەسەڵاتدارەکان لەخۆدەگرێت، گرووپە چەکدارەکانی لەوە بێبەری کرد کە لەپشت ئەو بۆردومانانەوە بن کە بە فڕۆکەی بێفڕۆکەوان کرانە سەر هەرێمی کوردستان و شارەکانی دیکەی عێراق.

وێنە گەورەکە: ماوەیەکە هێرشە درۆنییەکان بۆسەر ژێرخانی وزەی هەرێمی کوردستان زیادییان کردووە. لە ڕابردوو دامەزراوە ئەمنییەکانی هەرێمی کوردستان گرووپە توندڕەوە عێراقییەکانیان بە جێبەجێکاری ئەو هێرشانە زانییوە.

لێدوانی فەرمی: پەرلەمانتار عامر فایز، سەرکردە لە چوارچێوەکە، بە میدیای عێراقی ڕاگەیاند: ئێمە سەرکۆنە و ئیدانەی کردەوەکانی کردنەئامانجی کێڵگە نەوتییەکانی هەرێمی کوردستان و کردەوەکانی دیکەی لەو جۆرە دەکەین، کە هێزگەلێک لە پشتیانەوەن و دەیانەوێت یاری بە سەقامگیری و ئاسایشی عێراق بکەن و هەوڵی شەرمەزارکردنی حکومەتی عێراق دەدەن.

فایز ڕوونیکردەوە: "حکومەتی عێراق جددی دەبێت لە گەڕان بەدوای سەرچاوەی ئەم فڕۆکە بێفڕۆکەوانانەدا، ئێمە ڕەزامەند نەبووین و نابین لەسەر تێوەگلاندنی عێراق لە هیچ ململانێیەکی ناوچەکەدا، ئەم بابەتە کۆدەنگیی سیاسیی لەسەرە، هەروەها کۆدەنگیی گرووپە چەکدارەکانیشی لەسەرە."

ئەوەی لەوبارەیەوە دەگوترێت: بە گوتەی سەرکردەکەی چوارچێوەی هەماهەنگی: "ئاراستەی ئێستای گرووپە چەکدارەکان لەگەڵ سەقامگیریی عێراقدایە و لەگەڵ ئەوەدان کە وڵات تێوەنەگلێنرێت لە هیچ شەڕێکی لاوەکی یان هیچ ململانێیەک لە ناوچەکەدا." جەختیشیکردەوە کە "سەرکردەی ئەو گرووپانە، چوارچێوەی هەماهەنگی و حکومەتی عێراقیشیان ئاگادارکردووەتەوە کە هیچ پەیوەندییەکیان بە بۆردوومانەکانەوە نییە کە بە فڕۆکەی بێفڕۆکەوان ئەنجام دەدرێن و بە تەواوەتی لێیەوە دوورن."