کەسوکاری کوژراوەکەی وەرتێ ئەنجوومەنێک دوور لە حیزبایەتی پێکدەهێنن؛ کەیسەکە بەلاڕێدا نەبرێت

ئاڤا نیوز

کەسوکاری کوژراوەکەی وەرتێ لەڕێگەی ئەنجوومەنێکەوە داوا دەکەن کەیسی کوژرانی حەسەن ڕەحمان، خۆپیشاندەرە کوژراوەکەی وەرتێ بەلاڕێدا نەبرێت و یاساش سەروەر بێت لە چارەسەرکردنی کێشەکەدا.

چیرۆکی سەرەکی: شەوی یەکشەممە لەسەر پردی حافیز لە ناحیەی وەرتێ، هاونیشتمانیانی ناحیەکە گردبوونەوە بۆ ناڕەزایی دەربڕین بەرامبەر کەمبوونەوەی کارەبا، دوای ئەوەی گرژی لەنێوان خۆپیشاندەران و هێزە ئەمنییەکان دروست بوو، هاونیشتمانییەک بەناوی (حەسەن ڕەحمان) گولـلەی بەرکەوت و گیانی لەدەست دا.

ڕاگەیێنراوی فەرمی: لە وەرتێ، ئەمڕۆ كەسوكاری ئەو خۆپیشاندەرەی لە گرژی و ئاڵۆزییەکان کوژرا، بۆ میدیاكان قسەیان كرد و ڕایانگەیاند، هەندێك كەس دەیانەوێت كەیسەكە بەلاڕێدا ببەن و بیبەنە قالبی حیزبایەتییەوە، "بەڵام لێرەوە بە هەمووانی ڕادەگەیێنین كە دەرگامان لەسەر هیچ كەس دانەخستووە، نە پارتی و نە یەكێتی و نە هیچ حیزبێكی دیكە".

"گوتیشیان ئێمە ئەنجوومەنێكمان بەناوی ئەنجوومەنی باڵای باڵەكایەتی پێکهێناوە، هەموو حیزبێكیشمان تێدایە و ئەنجوومەنەكە هی خەڵكە و ئێستا چاوەڕوانین لەو كەیسەدا یاسا مافمان دابین بكات و یاسا سەروەر بـێت".

پەیامی فەرمی: بەختیار عەلی، نوێنەری ئەنجوومەنی باڵەکایەتی، پەیامی ئەنجوومەنەكەی خوێندەوە و جەختی كردەوە، بە بڕیاری ئەنجوومەنەكە خۆیان لە هەموو گرژی و ئاڵۆزی و كاردانەوەیەكی توند دوور گرتووە، دەیانەوێ یاسا سەروەر بێت و كەیسەكەش بە لاڕێدا نەبرێت و لایەنی پەیوەندیدار بە ئەركی سەر شانی خۆی هەڵسێت.

باکگراوند: دوێنێش وەزارەتی ناوخۆ ڕایگەیاند، لایەنە پەیوەندیدارەکان ڕاسپێردراون بۆ لێکۆڵینەوە و گرتنەبەری ڕێکاری یاسایی.