دوای کوژرانی زیاتر لە 200 کەس ئاگربەست لە سوەیدا ڕاگەیێنرا

ئاڤا نیوز

پارێزگای سوەیدای سووریا ڕووبەڕووی قەیرانێکی مرۆییی قووڵ و پەرەسەندنێکی مەیدانیی خێرا بووەتەوە، شارەکە لە دۆخێکی "ئارامیی بەئاگایی"دایە، بەڵام ترس لە نوێبوونەوەی پێکدادانەکان وایکردووە خەڵک بەردەوام بن لە جێهێشتنی ماڵەکانیان.

وێنە گەورەکە: دوای دوو ڕۆژ لە پێکدادانی خوێناوی لەنێوان چەکدارە درووزە خۆجێییەکان و هێزەکانی سەر بە وەزارەتی بەرگری کە تا ئێستا بووەتە هۆی کوژرانی 93 کەس لە ڕیزەکانی وەزارەتی بەرگریی سووریا، بە گشتی زیاتر لە 200 کەس کوژراون، لەنێویاندا دەیان هاووڵاتیی سڤیل و منداڵ هەن.

چی ڕوویدا: لە ماوەی دوو ڕۆژی ڕابردوودا، شەڕ و پێکدادانێکی خوێناوی لە نێوان هێزەکانی سەر بە حکومەتی سووریا و درووزییەکانی پارێزگای سوەیدا لە سووریا ڕوویدا و سەدان کەس بوونە قوربانی، ئەمڕۆ سێشەممە، سوپای سووریا چووە نێو شارەکە، ئەمەش ئیسرائیلی نیگەران کرد و بڕیاری دا هێرش بکاتە سەریان، ئەوبوو دوو هێرشی ئاسمانی کردە سەر هێزەکانی سوپای سووریا.

زانیاریی بەدەستهاتوو: بەگوێرەی ڕوانگەی سووری بۆ مافەکانی مرۆڤ، دۆخی مرۆییی شارەکە بە تەواوی داڕماوە؛ کارەبا و ئاو پچڕاون، بازاڕەکان داخراون و مەترسیی کەمبوونەوەی خۆراک و دەرمان لە ئارادایە. ئەم نائارامییە بووەتە هۆی شەپۆلێکی بەرفراوانی ئاوارەبوون کە تێیدا خێزانەکان بەکۆمەڵ لە ترسی بۆردوومان و پێکدادانەکان، شارەکەیان بەرەو گوندەکانی دەوروبەر جێهێشتووە.

پێدراوە ڕاستییەکان: بەگوێرەی ڕوانگەکە، هێزەکانی سەر بە وەزارەتی بەرگری تۆمەتبار دەکرێن بە ئەنجامدانی پێشێلکاریی گەورە، وەک تاڵانکردن و سووتاندنی ماڵی هاووڵاتیان، هێرشکردنە سەر شوێنی پەرستش وەک کەنیسەی مار میخائیل و سووکایەتیکردن بە کەرامەتی دانیشتووانی درووز، ئەمەش ئاگری ناکۆکییەکانی زیاتر خۆش کردووە.

ئەوەی ئێستا ڕوودەدات: سەرەڕای گەیشتنی هێزی پشتیوانیی سەربازیی زیاتر بۆ دەوروبەری شارەکە، بەڵام دوایین پێشهاتەکان ئاماژە بە کشانەوەی ئۆتۆمبێلە زرێپۆشەکان و چەکی قورس لەناو شار دەکەن. ئەمەش دوای ڕاگەیاندنی ئاگربەستێکی ناسەقامگیر دێت لەلایەن وەزیری بەرگریی حکومەتی ڕاگوزەرەوە.

ئەوەی پێشبینی دەكرێت: ئێستا هێزەکانی ئاسایشی گشتی لە شەقامە سەرەکییەکان بڵاوەیان پێکراوە و شارەکە لە دۆخێکی "ئارامیی بەئاگایی"دایە، بەڵام ترس لە نوێبوونەوەی پێکدادانەکان وایکردووە، خەڵک بەردەوام بن لە جێهێشتنی ماڵەکانیان و چارەنووسی ناوچەکە بە نادیاری ماوەتەوە.