خەمیس خەنجەر: گرێکوێرەی قەیرانی مووچە بەرەو کرانەوە دەچێت

ئاڤا نیوز

سەرۆکی هاوپەیمانیی سیادە بە تووندی سەرکۆنەی هێرشەکانی سەر کێڵگە نەوتییەکانی هەرێمی کوردستانی دەکات و ڕایدەگەیێنێت، ئەنجامدانی ئەم هێرشانە هاوکات لەگەڵ کرانەوەی گرێکوێرەی قەیرانی مووچە، ویستی "میلیشیا لەیاسادەرچووەکان" دەردەخات کە نایانەوێت وڵات بەرەو سەقامگیریی تەواو هەنگاو بنێت.

 

وێنە گەورەکە: ماوەیەکە هێرشە درۆنییەکان بۆ سەر ژێرخانی وزەی هەرێمی کوردستان زیادییان کردووە. لە ڕابردوو دامەزراوە ئەمنییەکانی هەرێمی کوردستان گرووپە توندڕەوە عێراقییەکانیان بە جێبەجێکاری ئەو هێرشانە زانییوە.

 

ڕاگەیێنراوی فەرمی: خەمیس خەنجەر، سەرۆکی هاوپەیمانیی سیادە لە ڕاگەیێنراوێکدا هێرشە تیرۆریستییەکانی سەر کێڵگە نەوتییەکانی لە پارێزگاکانی دهۆک و هەولێر بە هەڕەشەیەکی مەترسیدار بۆ سەر ئاسایش و سەقامگیریی وڵات و بەئامانجگرتنێکی ڕاستەوخۆی دەرامەتی عێراقییەکان ناو دەبات.

 

خەنجەر جەختی لەوە کردەوە کە بەردەوامیی ئەم دەستدرێژییانە، هاوکاتە لەگەڵ کرانەوەی گرێکوێرەی قەیرانی مووچەی فەرمانبەرانی هەرێمی کوردستان، کە بەرهەمی هەوڵە نیشتمانی و دڵسۆزانەکانی نێوان بەغدا و هەولێر بوو. ئەو دەشڵێت، "ڕەنگدانەوەی ویستی میلیشیا لەیاسادەرچووەکانە کە نایانەوێت وڵات بەرەو سەقامگیریی تەواوی سیاسی، ئەمنی، کۆمەڵایەتی و ئابووری هەنگاو بنێت."

 

لە کۆتاییدا، سەرۆکی هاوپەیمانیی سیادە پشتیووانیی خۆی بۆ هەوڵەکانی محەممەد شیاع سوودانی، سەرۆکوەزیران دەربڕی بۆ ئاشکراکردنی ئەو لایەنانەی لەپشت ئەم هێرشانەوەن و دووپاتیکردەوە کە "پشتگیریی تەواو لە ڕێوشوێنەکانی هێزە ئەمنییەکانی عێراق دەکەن بۆ ڕووبەڕووبوونەوەی ئەم دەستدرێژییانە."