سامانە سرووشتییەکان: هێرشە درۆنییەکان زیانی زۆریان بە کێڵگەکانی نەوت گەیاندووە

ئاڤا نیوز

وەزارەتی سامانە سرووشتییەکان ڕادەگەیەنێت، بە هۆی هێرشە درۆنییەکانی بەیانی ئەمڕۆ بۆ سەر کێڵگە نەوتییەکانی لە قەزای شێخان و ئیدارەی زاخۆ، زیانێکی زۆری بە ژێرخانی کێڵگەکانی نەوت گەیاندووە.

چیرۆکی سەرەکی: سەر لە بەیانی ئەمڕۆ بە چوار درۆن هێرش کرایە سەر سێ کێڵگەی نەوت لە سنووری ئیدارەی سەربەخۆی زاخۆ و پارێزگای دهۆک، لە ئەنجامدا زیانی زۆر بەر کێڵگەکانی نەوت کەوتووە.

ڕاگەیێنراوی فەرمی: وەزارەتی سامانە سرووشتییەکان ڕایدەگەیەنێت: سەر لەبەیانی ئەمڕۆ چوارشەممە 16ی تەممووزی 2025 لەڕێگەی درۆنی بۆمبرێژکراوەوە ژمارەیەک هێرشی تیرۆریستی کرایە سەر کێڵگەکانی نەوتی تاوکێ و پیشخابوور لە ئیدارەی سەربەخوی زاخۆ و هەنت ئۆیڵی ئەمریکی لە قەزای شێخانی سەر بە پارێزگای دهوک.

- هەر چەندە  هێرشەکان زیانی گیانی نەبووە، بەڵام زیانێکی زۆر بە ژێرخانی کێڵگەکان کەوتووە.

- وەزارەتی سامانە سرووشتییەکان بە تووندی ئەم هێرشە تیرۆریستییانە ئیدانە و شەرمەزار دەکات کە  مەبەست لێدانە لە ژێرخانی ئابووریی هەرێمی کوردستان و دروستکردنی مەترسییە لە سەر سەلامەتی کارمەندانی مەدەنی کەرتی وزە.

- "وەزارەتمان بانگەوازی هەموو لایەنە پەیوەندیدارەکان لە حکومەتی فیدراڵی و کومەڵگەی نێودەوڵەتی دەکات بەزووترین کات بێنە سەر خەت بۆ پاراستنی گیانی کارمەندانی مەدەنی و ئەمنییەتی وزە و  ڕێگریکردن لە هێرشی دیکە بۆ سەر کەرتی وزەی هەرێمی کوردستان".

- وەزارەتی سامانە سرووشتییەکان هەموو هەوڵێکی خۆی بۆ پاراستنی گیانی کارمەندانی کەرتی ووزە و پێگەی ستراتیژی خۆی لە دابینکردنی سەقامگیری ووزە لە ناوچەکە و جیهان دەدات.