ئەنجوومەنی وەزیرانی کوردستان ڕەزامەندی لەسەر لێکتێگەیشتنەکەی هەولێر و بەغدا دا

ئاڤا نیوز

 

ئەنجوومەنی وەزیرانی هەرێمی کوردستان ڕەزامەندی لەسەر لێکتێگەیشتنی تایبەت بە پرسی مووچە و شایستە داراییەکانی لەگەڵ حکومەتی فیدراڵ نیشان دا.

 

چیرۆکی سەرەکی: ئەمڕۆ چوارشەممە 16-7-2025، بە سەرپەرشتی سەرۆکوەزیران مەسرور بارزانی و ئامادەبوونی قوباد تاڵەبانی، جێگری سەرۆکوەزیران، ئەنجوومەنی وەزیرانی هەرێمی کوردستان کۆبووەوە، پرسی مووچە و شایستە داراییەکانی هەرێم و هەناردەکردنەوەی نەوت تەوەری سەرەکی گفتوگۆکان بوو.

 

ڕاگەیێنراوی فەرمی: ئەنجوومەنی وەزیرانی کوردستان بڵاویکردەوە، لە کۆبوونەوەکەدا، هێرشە تیرۆرستییەکانی سەر هەرێمی کوردستان، بەتایبەت هێرشی سەر کێڵگە نەوتییەکانی هەرێم کە زیانی زۆری ماددی بە پرۆسەی بەرهەمهێنانی نەوت گەیاندووە، شەرمەزار کرا، جەخت لەسەر ئەوە کرایەوە کە ئەو هێرشانە بۆ لێدان لە ژێرخانی ئابووریی وزە.

 

-ئەنجوومەنی وەزیرانی هەرێمی کوردستان داوا لە حکومەتی فیدراڵ دەکات، کە ئەرکی خۆی جێبەجێ بکات و سنوورێک بۆ ئەو هێرشانە دابنرێت، هەروەها ڕێکاری یاسایی بەرامبەر ئەو تێکدەرانە بگیرێتەبەر.

 

- بارودۆخی دارایی هەرێمی کوردستان و ڕێڕەوی دانوستاندن و گفتوگۆکان لەگەڵ حکومەتی فیدراڵ سەبارەت بە مووچە و شایستە داراییەکانی هەرێمی کوردستان تاوتوێ کران.

-وردەکاری لە یەکترتێگەیشتنە هاوبەشەکەی ڕۆژی 15-7-2025ی بەغدا، کە تایبەت بوو بە دابینکردنی شایستە داراییەکانی هەرێمی کوردستان و پابەندییەکانی هەرێم خستیانە ڕوو.

 

ئەوەی پێویستە بیزانیت: دوای گفتوگۆ و ڕاگۆڕینەوە، ئەنجوومەنی وەزیران پێشوازیی لەو لێکتێگەیشتە کرد و بڕیاری جێبەجێکردنی ناوەڕۆکەکەی دا، بڕیاریشە لە بەرامبەردا حکومەتی فیدراڵ مووچە و شایستە داراییەکانی هەرێمی کوردستان بنێرێت.