ئاڤا زانیاری لەسەر ئەو درۆنە ئاشکرا دەکات کە لە نزیک کێڵگەی بای حەسەن کەوتە خوارەوە

ئاڤا نیوز

فڕۆکەیەکی بێفڕۆکەوانی نەناسراو لە نزیک کێڵگەی بای حەسەنی باکوور لە سنووری گوندی ماما سەر بە قەزای دوبز لە باکووری ڕۆژئاوای پارێزگاکە کەوتە خوارەوە. سەرچاوەیەک لە پۆلیسی دوبز گوتی، درۆنەکە تەقەمەنییەکەی ناوی نەتەقیوە.

 

زانیاریی بەدەستهاتوو: سەرچاوەیەکی ئەمنی لە کەرکووک ڕایگەیاند, "درۆنەکە لە زەوییە کشتوکاڵییەکانی نزیک گوندی بای حەسەن کەوتووەتە خوارەوە، بەبێ ئەوەی ڕووداوەکە هیچ زیانێکی گیانی یان ماددی لێبکەوێتەوە."

 

لێدوانی فەرمی: سەرچاوەیەک لە پۆلیسی قەزای دوبز  بە ئاڤای گوت، کەمێک پێش ئێستا درۆنێک لە دووریی کێڵگەی بای حەسەن کەوتۆتە خوارەوە.

 

ئاڤا زانیویەتی، درۆنەکە خۆی کەوتووەتە خوارەوە، بەڵام تەقەمەنییەکەی ناوی نەتەقیوە، بە دروستیش لە گوندی عەزیزییە کەوتۆتە خوارەوە.

 

هاوکات: بە گوتەی ئەو سەرچاوە ئەمنییەی کەرکووک، "لایەنە ئەمنییەکان دەستیان بە لێکۆڵینەوە کردووە بۆ زانینی جۆر و سەرچاوەی درۆنەکە، ئەوەی کە ئایا بۆ مەبەستی سیخوڕی بووە یان ڕاهێنان. ئاماژەی بەوەشکرد، "ڕووداوەکە کاریگەری لەسەر کارکردن لە کێڵگە نەوتییەکە یان دانیشتووانی ناوچەکە نەبووە".

 

ئەوەی پێویستە بیزانیت: کێڵگەکانی بای حەسەن بە یەکێک لە کێڵگە نەوتییە گرنگەکانی باکووری کەرکووک دادەنرێن و ناوچەکە لە ماوەکانی پێشوودا شایەتحاڵی جووڵەی هاوشێوەی فڕۆکەی بێفڕۆکەوانی نەناسراو بووە.

 

ئەمەش بزانە: ئەم ڕووداوە هاوکاتە لەگەڵ سێ هێرشی جیا بۆ سەر سێ کێڵگەی نەوتی لە هەرێمی کوردستان لە بەرەبەیانیی ئەمڕۆ چوارشەممە لە ڕێگەی چوار درۆنی بۆمبڕێژکراوەوە بووە.