لە دیمەشق تەقینەوەیەکی بەهێز ڕوویدا؛ دەوترێت "سوپای ئیسرائیل" هێرشی ئەنجامداوە

ئاڤا نیوز

نیوەڕۆی ئەمڕۆ چوارشەممە تەقینەوەیەکی بەهێز لە دیمەشقی پایتەختی سووریا ڕوویدا و میدیای ئیسرائیلیش دەڵێت، سوپای وڵاتەکەی وەک کاردانەوەیەک بەرامبەر ڕووداوەکانی سوەیدا، هێرشەکەی دیمەشقی ئەنجامداوە.

وێنە گەورەکە: دوای چەند ڕۆژێک لە شەڕ و پێکدادان و کوژرانی لانیکەم 250 کەس، 15ی تەممووز سووپای سووریا ناوەندی پارێزگای سوەیدای زۆرینەی دروزی لە باشووری وڵاتەکەی کۆنترۆڵکرد، سەڕای هێرشی ئیسرائیلیش بۆسەر چەند پێگەیەکی سوپا و ڕاگەیاندنی ئاگربەست لەناو شارەکەدا، بەڵام تائێستا گرژییەکان لە سوەیدا بە تەواوی نەوەستاون و نائارامییەکان بەردەوامن.

زانیاریی بەدەستهاتوو: ڕوانگەی سووری بۆ مافەکانی مرۆڤ بڵاویکردەوە، کەمێک لەمەوبەر تەقینەوەیەکی بەهێز لە نزیک وەزارەتی بەرگری سووریا لە دیمەشق ڕوویدا، هاوکات ئێستا فڕۆکەی ئیسرائیلیش بەسەر ئاسمانی دیمەشق دەسوڕێتەوە.

لەلایەکی دیکەوە: میدیای ئیسرائیلیش بڵاویکردەوە، وەک پەیامێک بۆ سەرۆکی سووریا بەرامبەر ڕووداوەکانی سوەیدا، ئەمڕۆ سوپای وڵاتەکەیان هێرشی بۆسەر دیمەشق ئەنجامداوە.