هێرشە درۆنییەکان و ڕاگەیێنراوە "ناڕوون"ـەکەی حکومەتی عێراق و دروستبوونی گومان

ئاڤا نیوز

ڕاگەیێنراوێکی حکومەتی عێراق سەبارەت بە هێرشە درۆنییەکان بۆ سەر بنکە و سیستەمی ڕاداری هێزە چەکدارەکان، ڕەخنەی تووندی لێکەوتووەتەوە. شارەزایانی ئەمنی و ستراتیژی بە "لێڵ و نادیار" ناوی دەبەن و پێیانوایە ناتوانێت وەڵامی نیگەرانییەکانی شەقامی عێراقی بداتەوە.

ئەوەی پێویستە بیزانیت: ئەو لیژنەیەی بۆ لێکۆڵینەوە لە هێرشە درۆنییەکانی سەر بنکە و سیستەمی ڕاداری هێزە چەکدارەکانی عێراق پکهێنرابوو، ئاشکرای دەکات کە "ئەو درۆنانە لە دەرەوەی عێراق دروستکراون بەڵام لەناو خاکی عێراقەوە هەڵدراون. لایەنە تێوەگلاوەکان و شوێنی هەڵدانیان دەستنیشانکراون"، بەبێ ئەوەی ناویان بهێنێت.

لێدوانی فەرمی: مستەفا تائی، شارەزا لە کاروباری ستراتیژی، ڕایگەیاند کە "ئەم ناڕوونییە دەرفەت بۆ گومان و لێکدانەوەی جیاواز دەکاتەوە و متمانەی نێوان هاووڵاتییان و دامەزراوەکانی دەوڵەت لاواز دەکات." ئاماژەی بەوەشکرد، ئاشکرانەکردنی لایەنەکان نیشانەی لاوازیی حکومەتە، یان بوونی "سازانێکی گوماناوی" و ملکەچبوونە بۆ حیساباتی دەرەکی.

ئەوەی ئێستا ڕوودەدات: ئەم هێرشانە هاوکاتن لەگەڵ قۆناغی دوای وەستانی شەڕی ئیسرائیل-ئێران، چاودێران پێیانوایە عێراق بووەتە گۆڕەپانێک بۆ "ئاڵوگۆڕی پەیام" لەنێوان هێزە هەرێمییەکاندا. ئەمە لەکاتێکدایە کە پێشتر چەندین هێرشی هاوشێوە لە شارەکانی هەرێمی کوردستان، سەڵاحەددین و دیالە ئەنجامدراون و لێکۆڵینەوەکان هیچ ئەنجامێکی ئاشکرایان نەبووە.

ئەو مانایە دەیگەیێنێت: ئەم هێرشانە وەک تاقیکردنەوە یان لاوازکردنی توانای بەرگریی عێراق سەیر دەکرێن بۆ هەر سیناریۆیەکی گرژیی داهاتوو، ئەمەش لەکاتێکدایە کە ترسی ئەوە هەیە عێراق جارێکی دیکە بکرێتەوە بە گۆڕەپانی ململانێکان.