نوێنەری ئەمریکا لەگەڵ وەزیرانی دەرەوەی ئوردن و سووریا کۆدەبێتەوە

ئاڤا نیوز

ئەمریکا هەوڵەکانی چڕکردووەتەوە بۆ چەسپاندنی ئاگربەست لە شاری سوەیدای سووریا و ڕێگریکردن لە زیادبوونی گرژییەکان. بۆ ئەم مەبەستە نوێنەری سەرۆکی ئەمریکا لەگەڵ وەزیرانی دەرەوەی ئوردن و سووریا کۆبوویەوە.

وێنە گەورەکە: تۆماس باراک، نوێنەری تایبەتی ئەمریکا بۆ کاروباری سووریا لەگەڵ ئەیمەن سەفەدی و ئەسعەد شەیبانی وەزیرانی دەرەوەی ئوردن و سووریا کۆبوویەوە و باسیان لە دۆخی سووریا کرد.

زانیاریی بەدەستهاتوو: تۆماس باراک، نوێنەری تایبەتی ئەمریکا بۆ کاروباری سووریا لە ئەکاونتی خۆی لە تۆڕی کۆمەڵایەتیی ئێکس بڵاویکردووەتەوە، لەکۆبوونەوەکەدا، ئەمریکا و ئوردن پشتگیری خۆیان بۆ ڕێککەوتنی ئاگربەست و هەوڵەکانی حکومەتی سووریا بۆ جێبەجێکردنی دووپاتکردەوە.

هەروەها جەختیان لەسەر پشتیوانی تەواوی ئوردن و ئەمریکا بۆ سووریا و ئاسایش و سەقامگیری و سەروەری و یەکپارچەیی خاکەکەی و سەلامەتی هاووڵاتیانی کردەوە و ڕایانگەیاند کە سەقامگیری سووریا بەردی بناغەی سەقامگیری ناوچەکەیە.

ڕێککەوتنەکە بەم شێوەیەیە: هەر سێ وڵاتەکە لەسەر کۆمەڵێک هەنگاوی کرداری ڕێککەوتن بۆ پشتیوانیکردنی سووریا لە جێبەجێکردنی ڕێککەوتنەکەدا، بەشێوەیەک کە ئاسایش و سەقامگیری وڵاتەکە مسۆگەر بکات و هاووڵاتیانی مەدەنی بپارێزێت و سەروەری دەوڵەت و یاسا لەسەرتاسەری خاکی سووریادا بچەسپێنێت.

ئەم هەنگاوانە چەسپاندنی ئاگربەست و بڵاوەپێکردنی هێزە ئەمنییەکانی سووریا لە پارێزگای سوەیدا و ئازادکردنی دەستبەسەرکراوانی لایەنەکان و پێشخستنی هەوڵەکانی ئاشتەوایی کۆمەڵایەتی و بەهێزکردنی ئاشتی کۆمەڵایەتی و ئاسانکاری بۆ گەیاندنی هاوکارییە مرۆییەکان لەخۆدەگرێت.

پەیوەست بەم بابەتە: ئەمریکا و ئوردن پێشوازییان لە پابەندبوونی حکومەتی سووریا کرد بۆ لێپرسینەوە لەوانەی بەرپرسیارن لە پێشێلکارییەکان دژی هاووڵاتیانی مەدەنی لە پارێزگای سوەیدا و پشتیوانی خۆیان بۆ هەوڵەکانی ڕەتکردنەوەی توندوتیژی و تائیفی و ئاژاوەگێڕی و هاندان بۆ توندوتیژی و ڕق و کینە دەربڕی.