ئەمریکا فشار لە پارتی و یەکێتی دەکات بەزووترین کات حکومەت پێکبهێنن

ئاڤا نیوز

ئەمریکا گوشار لە پارتی و یەکێتی دەکات پەلە بکەن لە پێکهێنانی کابینەی نوێی حکومەت و چاوەڕێی نەکەن تا هەڵبژاردنەکانی عێراق دەکرێت، ئاڤاش زانیویەتی ئەم هەفتەیە هەردوولا جارێکی دیکە کۆدەبنەوە بۆ پێکهێنانی حکومەت و یەکێتیش گۆڕانکاری لە داواکارییەکانی لەبارەی پۆستەکان کردووە.

وێنە گەورەکە: نزیکەی ساڵێک بەسەر دوایین هەڵبژاردنی پەرلەمانی کوردستان تێدەپەڕێت، پارتی و یەکێتی وەک براوەی یەکەم و دووەمی هەڵبژاردنەکە، چەندینجار کۆبوونەوەتەوە، بەڵام تا ئێستا نەگەیشتوونەتە ڕێککەوتن لەبارەی پێکهێنانی حکومەتی نوێ.

زانیاریی تایبەت: ئاڤا زانیویەتی فشاری ئەمریکا هەیە و بەڕوونی بە پارتی و یەکێتییان گوتووە دەبێت بەزووترین کات حکومەت پێکبهێنرێت، پێویست ناکات بۆ دوای هەڵبژاردنی عێراق دوای بخەن.

پارتی و یەکێتیش بەنیازن ئەم هەفەتەیە دەست بە کۆبوونەوە بکەنەوە، بەپێی گوتەی بەرپرسانی هەردوولا گفتوگۆكان گەیشتوونەتە خاڵەكانی كۆتایی و ڕاگەیاندنی كابینەی نوێ نزیكە.

لێدوانی فەرمی: ئەندامێکی مەكتەبی سیاسیی یەكێتی بە ئاڤای گوت: ئەم هەفتەیە کۆبوونەوە دەکرێت، بەڵام تا ئێستا نازانرێت کۆبوونەوەکە لە هەولێر دەکرێت یان لە سلێمانی.

ئەوەی پێویستە بیزانیت: ئەوەی لەنێوان یەکێتی و پارتی ماوەتە دابەشکردنی پۆستەکانە،  ئاڤا زانیویەتی یەكێتی گۆڕانکاری لە داواکارییەکانی کردووە لەبارەی پۆستەکان و ئەم هەفتەیە قسەی لەسەر دەکەن، شاندی پارتیش چەند پێشنیازێکی نوێ پێشکەشی یەکێتی دەکەن.

ئەمڕۆ شەممە، سەرۆکوەزیران مەسرور بارزانی پێشوازی لە ستیڤن ڤەیگن، هەڵسوڕێنەری باڵیۆزخانەی ئەمریكا لە بەغدا  و ستیڤ بیتنەر، کونسوڵی گشتیی ئەمەریکا لە هەولێر کرد، لەبارەی مووچە هەردوولا هاوڕابوون پێویستە حکومەتی فیدراڵ لە زووترین کاتدا مووچە و شایستە داراییەکانی هەرێمی کوردستان بنێرێت، لە نزیکترین کاتیشدا هەناردەکردنی نەوت دەستپێبکاتەوە.