عێراق لیژنەیەک بۆ لێکۆڵینەوە لە هۆکاری گیانلەدەستدان و برینداربوونی چوار سەرباز پێکدەهێنێت

ئاڤا نیوز

بە فەرمانی سابت عەباسی، وەزیری بەرگریی عێراق لیژنەیەکی لێکۆڵینەوە لەبارەی ڕووداوی گیانلەدەستدانی سەربازێک و برینداربوونی سیانی دیکە لە ئەنبار پێکهێنرا.

 

چیرۆکی سەرەکی: ڕۆژی شەممە، لەکاتی ئەرکدا سەقفی کەرەڤانێک بەسەر چەند سەربازێکی فەوجی سێی لیوای مەغاویری فەرماندەیی ئۆپەراسیۆنەکانی جزیرە داڕما، لە ئەنجامدا سەربازێک گیانی لەدەست دا و سیانی دیکەش برینداربوون.

 

ڕاگەیێنراوی فەرمی: سابت عەباسی، وەزیری بەرگریی عێراق ڕایگەیاند: فەرمانمان کردووە لیژنەیەکی بەپەلەی لێکۆڵینەوە پێکبهێنرێت بۆ بەدواداچوون بۆ ڕووداوی شەهیدبوون و برینداربوونی چەند سەربازێک".

 
وەزیری بەرگریی عێراق دووپاتی کردەوە، هەموو ڕێکارە یاساییەکان بەرامبەر هەر کەمتەرخەمییەک لە ڕووداوەکە دەگرنەبەر.