درووزەکان داوای کشانەوەی سەرجەم هێزەکانی سووریا دەکەن

ئاڤا نیوز

درووزەکانی پارێزگای سوەیدای باشووری سووریا داوا لە حکومەتی دیمەشق دەکەن سەرجەم هێزەکانی لە شاخی سوەیدا و شار و شارۆچکەکانی دەوروبەری بکشێنێتەوە، داوای دەستبەجێ ئازادکردنی سەرجەم ڕاگیراوەکانیش دەکات.

وێنە گەورەکە: هەفتەیەکە شەڕ و پێکدادان لە نێوان خێڵە بەدەوییەکان و چەکدارانی درووز لە سوەیدای سووریا بەردەوامە و بەهۆیەوە دەوروبەری هەزار کەس کوژراون، هەرچەندە لە پێنجشەممەی ڕابردووشەوە ئاگربەست ڕاگەیێنراوە، بەڵام گرژییەکان نەوەستاون و ناوەناوە پێکدادان هەیە.

ڕاگەیێنراوی فەرمی: سەرۆکایەتی ڕۆحی درووزەکان کە حیکمەت هیجری سەرۆکایەتی دەکات، ئێوارەی ئەمڕۆ یەکشەممە لە ڕاگەیێنراوێکدا باسی لەوەكردووە، سەرلەنوێ داوای ڕاگرتنی هەموو هێرشە سەربازییەکان و کشانەوەی هەموو هێزەکانی حکومەتی دیمەشق دەکەن لە شاخی سوەیدا و شار و شارۆچکەکانی دەوروبەری، لەوانەش سوپا، هێزە ئەمنییەکان و میلیشیاکانیان.

ئەوەشی خستووەتەڕوو، داوای دابینکردنی هێڵی ئینتەرنێت دەکەن بۆ ئەوەی خەڵکی ناوچەکە بتوانن لەگەڵ یەکتریدا پەیوەندی ببەستن، هەروەها داوای دەستبەجێ ئازادکردنی هەموو ڕاگیراوەکان و سەرخستنی پرۆسەکە دەکەن بە چاودێری وڵاتان.