فەرمانی دەستگیرکردن بۆ خاوەنی مۆڵەکەی کوت و ژمارەیەک بەرپرس دەرکرا

ئاڤا نیوز

ئەنجوومەنی باڵای دادوەریی عێراق ڕایدەگەیێنێت، لەسەر ئاگرکەوتنەوەی هایپەر مارکێتەکەی شاری کوت فەرمانی دەستگیرکردن بۆ خاوەنی باڵەخانە سووتاوەکە و هاوبەشەکەی، لەگەڵ ژمارەیەک بەرپرسی ئێستا و پێشووی شارەوانی و بەرگریی شارستانی دەرکردووە و زۆربەی تۆمەتبارەکانیش دەستگیرکراون.

چیرۆکی سەرەکی: ڕۆژی چوارشەممەی ڕابردوو، بەهۆی ئاگرکەوتنەوەیەکی دڵتەزێن لە سەنتەری بازاڕکردنی "هایپەر مارکێت" لە شاری کوت، ناوەندی پارێزگای واست، نزیکەی 70 کەس گیانیان لەدەستدا، کە پیاو و ژن و منداڵیان تێدابوو. کاردانەوەکانیش لەسەر ڕووداوەکە بەردەوامە.

ڕاگەیێنراوی فەرمی: ئەنجوومەنی باڵای دادوەری لە ڕاگەیەندراوێکدا ئاشکرای کرد کە دادگای تێهەڵچوونەوەی واست، دەستبەجێ دوای گەیشتنی ڕاپۆرتی ئەمنی، دەستەیەکی لێکۆڵینەوەی دادوەریی پێکهێنا، دوای ئەوەی سەردانی شوێنی ڕووداوەکەیان کردووە و دەستبەجێ دەستیان بە لێکۆڵینەوە و دەرکردنی فەرمانی دەستگیرکردن و پشکنین کردووە بۆ ئەو بەرپرس و کەسانەی کەمتەرخەم بوون.

بەپێی ڕاگەیێنراوەکە، فەرمانی دەستگیرکردن بۆ هەریەک لە خاوەنی باڵەخانەکە و هاوبەشەکەی، هەروەها بۆ بەرپرسی هۆبەی ڕێکخستنی شارەکان، بەرپرسی هۆبەی زیادەڕەوییەکان، یاریدەدەری بەڕێوەبەری شارەوانی، ڕووپێوێک لە شارەوانی، بەرپرسانی بەشی زیادەڕەوی، بەرپرسی هۆبەی خۆپارێزی و سەلامەتی لە بەرگریی شارستانی، بەڕێوەبەری بەرگریی شارستانیی واست، ئەفسەرانی بنکەی بەرگریی شارستانی و بەڕێوەبەری پێشووتری شارەوانیی کوت دەرچووە.

لە هەمان کاتدا: دەسەڵاتی دادوەری جەختیشی کردەوە کە سەرجەم فەرمانەکانی دەستگیرکردن جێبەجێ کراون، جگە لە خاوەنی باڵەخانەکە و هاوبەشەکەی، تۆمەتبارە دەستگیرکراوەکانیش ڕاگیراون.

لەلایەکی دیکەوە: دەستە لێکۆڵەرەکە وتەی شایەتحاڵەکانی وەرگرتووە، لەوانەش کرێکارانی ناو باڵەخانەکە (کە پێنجیان هاووڵاتیی سوورین)، شایەتحاڵانی شوێنی ڕووداوەکە و وتەی کەسوکاری قوربانییەکان و بریندارەکانیش تۆمار دەکات.