فایلی خەڵک؛ دانیشتووانی چه‌ند گوندێكی مێرگەسۆر و سیدەکان کێشەی ئینتەرنێتیان هەیە

ئاڤا نیوز

چەند گوندێکی سنووری مێرگەسۆر و سیدەکان کێشەی نەبوونی ئینتەرنێتیان هەیە و وتەبێژی وەزارەتی گواستنەوە و گەیاندنیش دەڵێت، کێشەکەیان چارەسەر دەکەین.

چیرۆکی سەرەکی: گوندەکانی لێرسماق و بێدور لە قەزای مێرگەسۆر و گوندی دوورملک لە قەزای سیدەکان، هەرسێکیان هاوسێی یەکن کەوتوونەتە یەک ناوچە، کێشەی نەبوونی ئینتەرنێتیان هەیە و داوا دەکەن بۆیان دابین بکرێت.

لێدوانی فەرمی: چەند هاونیشتمانییەک لەو سێ گوندە بە ئاڤایان وت، هێڵی ئینتەرنێت گەیێنراوەتە ئەو سنوورە تەنیا ئەو سێ گوندە نەبێت، داوا دەکەین هێڵی ئینتەرنێت بۆ گوندەکانی ئێمەش دابین بکرێت.

خەڵکی ئەو گوندانە دەڵێن لەڕێگەی یەکە ئیدارییەکانی سنوورەکە داواکاریمان بۆ کۆمپانیا بەرزکردووەتەوە، بەڵام تا ئێستا وەڵام نەدراوینەتەوە.

بۆچوونی لایەنی بەرامبەر: دیلان ڕەشاد، وتەبێژی وەزارەتی گواستنەوە و گەیاندن بە ئاڤای وت، "لە زووترین کات بەدواداچوون بۆ داواکاری خەڵکی ئەو سێ گوندە دەکەین، لەگەڵ کۆمپانیا و لایەنی پەیوەندیدار لەو سنوورە قسە دەکەین بۆ ئەوەی کار لەسەر جێبەجێکردنی داواکاری ئەو هاونیشتمانییانە بکرێت و هێڵی ئینتەرنێتیان بۆ دابین بکرێت".