باندێکی دزیکردن لە هەولێر دەستگیر دەکرێت

ئاڤا نیوز

پۆلیسی هەلێر باندێکی دزیکردنی لە شاری هەولێر دەستگیر کرد کە بەبیانووی گۆڕینەوەی دۆلار بە نرخێکی هەرزان فێلیان لە خەڵک دەکرد.

چیرۆکی سەرەکی: باندێکی پێنج کەسی لەڕێگەی تۆڕە کۆمەڵایەتییەکان ڕێکلامیان بە دروای لیبییەوە دەکرد. هەروەها دۆلاری ئەمریکییان بە هەمان نرخی بانکی ناوەندی ئالوگۆڕ پێدەکرد، دوای ئەوەی لەگەڵ ئەو کەسانە ڕێکدەکەوتن کە مامەڵەی گۆڕینەوەکەیان دەکرد، بەڵام لە پڕ لەکاتی ژماردن ڕایان دەکرد و پارەکەیان دەدزی، پۆلیس باندەکەی دەستگیر کردووە.

ڕاگەیێنراوی فەرمی: بەڕێوەبەرایەتیی پۆلیسی پارێزگای هەولێر ڕایگەیاند، دوای تۆمارکردنی سکاڵای هاووڵاتییەک لەسەر ئەوەی کەوا لە یەکێک لە شەقامەکانی شاری هەولێر پارەی لێ دزراوە، "دەستبەجێ دەستمان بە لێکۆڵینەوە کرد و بۆمان دەرکەوت کەوا باندێکی پێنج کەسین و بە ڕەگەز عەرەبی سووریان. ئەو باندە لەڕێگەی تۆڕە کۆمەڵایەتییەکانەوە ڕیکلامیان بە دراوی لیبییەوە دەکرد. هەروەها دۆلاری ئەمریکییان بە هەمان نرخی بانکی ناوەندی ئالوگۆڕ پێدەکرد، واتە 100 دۆلار بەرامبەر بە 130 هەزار دیناری عێراقی.

بە گوێرەی ڕاگەیێنراوەکە، ئەو باندە دوای ئەوەی لەگەڵ دادخواز ڕێکدەکەون بۆ ئالوگۆڕکردنی پارەکە، لەکاتی ژماردن لە پڕ ڕایان دەکرد.

ئەوەی پێویستە بیزانیت: ئێستا سەرجەم تۆمەتباران دەستگیرکراون و بە بڕیاری دادوەری لێکۆڵینەوە ڕاگیراون، لێکۆڵینەوەش لەگەڵیاندا بەردەوامە.