پەرلەمانی عێراق تاوتوێی هێرشە درۆنییەکانی سەر ژێرخانی وزەی هەرێمی کوردستان دەکات

ئاڤا نیوز

بڕیارە دوای نیوەڕۆی ئەمڕۆ دووشەممە ئەنجوومەنی نوێنەرانی عێراق دانیشتنێکی نائاسایی بۆ تاوتوێکردنی هێرشە تیرۆریستییەکان بە درۆنی بۆمبڕێژکراو بۆ سەر ژێرخانی وزەی هەرێمی کوردستان و دەرەنجامەکانی کارەساتی ئاگرکەوتنەوەکەی پارێزگای کوت بکات.

ئەوەی پێویستە بیزانیت: ئەم دانیشتنە نائاساییە لەکاتێکدایە کە هەردوو ڕووداوەکە کاردانەوەی بەرفراوانیان لەسەر ئاستی عێراق و هەرێمی کوردستان لێکەوتووەتەوە. هەردوو ڕووداوەکەش زیانی ماددی و گیانیان لێکەوتووەتەوە.

ڕاگەیێنراوی فەرمی: بەگوێرەی ڕاگەیێنراوی نووسینگەی پەرلەمانی عێراق،  ڕۆژی دووشەممە، 21ـی تەمموزی 2025، کاتژمێر 1ـی پاشنیوەڕۆ دانیشتنێکی نائاسایی بۆ تاوتوێکردنی دوو بابەتی گرنگ بکرێت.

یەکەم: گفتوگۆیەکی گشتی سەبارەت بە ڕووداوی ئاگرکەوتنەوەکەی کوت.

دووەم: گفتوگۆیەکی گشتی سەبارەت بە "هێرشە تیرۆریستییەکان بە درۆنی بۆمبڕێژکراو بۆ سەر ژێرخانی هەرێمی کوردستان."

باکگراوند: لە چەند ڕۆژی ڕابردوودا کێڵگە نەوتییەکانی هەرێمی کوردستان بوونە ئامانجی درۆنە بۆمبڕێژکراوەکان، بەهۆی هێرشەکانیشەوە بەرهەمهێنان لە بەشێکی کێڵگەکان بەشێوەیەکی کاتی وەستا، ئەمەش کاریگەریی نەرێنی لەسەر ئاستی بەرهەمهێنانی ئەو کێڵگانە و ژێرخانی ئابووریی عێراق و هەرێمی کوردستان دروست کرد.

شەوی 2025-07-16، لە شاری کوت لە پارێزگای واستی ناوەڕاستی عێراق، ئاگرێکی گەورە لە مۆڵێک کەوتەوە، بەهۆی نەبوونی مەرجی تەندروستیی و سەلامەتی، نزیکەی 70 کەس گیانیان لەدەست دا و دەیان کەسی دیکەش برینداربوون.