ئەم هەفتەیە بەغدا مووچەی پێشمەرگە و هێزە ئەمنییەکان دەنێرێت

ئاڤا نیوز

 

بڕیارە ئەم هەفتەیە، بەغدا بڕە پارەیەکی دیکە بۆ مووچەی مووچەخۆرانی هەرێمی کوردستان بنێرێت؛ پارەکە بۆ مووچەی پێشمەرگە و هێزە ئەمنییەکان دەبێت.

 

وێنە گەورەکە: بەهۆی نەناردنی بڕی پێویست بۆ مووچە لەلایەن بەغداوە، تاوەکو ئێستا دەست بە دابەشکردنی مووچەی مووچەخۆرانی هەرێمی کوردستان نەکراوە.

 

لێدوانی فەرمی: محەممەد عەبدولقادر، بەڕێوەبەری گشتیی ژمێرکاری لە وەزارەتی دارایی هەرێمی کوردستان بە ئاڤا نیوزی گوت: "لیستی مووچەی دەزگا ئەمنییەکان بە کۆدی بایۆمەترییەوە بۆ وەزارەتی دارایی عێراق نێردراوە، بەڵام هێشتا پارەی نەناردووە". 

 

لەلایەکی دیکەوە: نەرمین مەعرووف، جێگری سەرۆکی لیژنەی دارایی لە ئەنجوومەنی نوێنەرانی عێراق بە ئاڤا نیوزی گوت: "لەم دوو ڕۆژەدا بڕی پێویستی مووچە بۆ هێزە ئەمنییەکان دەخرێتە سەر هەژماری بانکیی هەرێمی کوردستان".

 

باکگراوند: حکومەتی عێراق بە سێ  قۆناغ پارەی مووچەخۆرانی هەرێمی کوردستانی ناردووە، تاوەکو ئێستا 608 ملیار دیناری خستووەتە سەر هەژماری بانکیی هەرێمی کوردستان.