دەست بە قەرەبووکردنەوەی زیانلێکەوتووانی چەند ناوچەیەکی دیکەی دهۆک دەکرێت

ئاڤا نیوز

    
پێش جەژنی ڕەمەزان قەرەبووی هەموو زیانلێکەوتووانی لافاوەکەی دهۆک دەکرێتەوە و پاککردنەوەی پاشماوەی لافاوەکەش لە قۆناغەکانی کۆتاییدایە.

 

چیرۆکی سەرەکی: دوای ئەوەی لە 19ـی ئەم مانگەدا لافاوێکی بەهێز دهۆکی گرتەوە و سێ کەس گیانیان لەدەستدا، ژمارەیەک لە هاووڵاتیان تووشی زەرەر و زیانێکی زۆری ماددی بوون و پارێزگاری دهۆکیش دڵنیایی دا، پێش جەژنی ڕەمەزان هەموویان قەرەبوو دەکرێنەوە.

 

لێدوانی فەرمی: د. عەلی تەتەر، پارێزگاری دهۆک بە ئاڤا نیوزی ڕایگەیاند: "پڕۆسەی پاککردنەوەی ئەو کۆڵان و شوێنانەی شاری دهۆک کە پێویستییان بە پاککردنەوە بوو، لە قۆناغی کۆتاییدایە".

 

زانیاریی زیاتر: سبەی سێشەممە دەست بە قەرەبووکردنەوەی پێنج ناوچەی دیکەی شارەکە دەکرێت؛ پێنج لیژنەش پێکهاتوون بۆ هەڵسەنگاندنی زیانە ماددییەکانی زیانلێکەوتووانی لافاوەکەی دهۆک.

ئەمەش بزانە: ئەمڕۆ دووشەممە کاروانێکی هاوکاری کە  18 بارهەڵگری لەخۆدەگرت و کەلوپەلی ناوماڵیان هەڵگرتبوو، بە بڕیاری سەرۆک بارزانی و سەرۆکوەزیران بارزانی لە هەولێرەوە بۆ دهۆک نێردران.