لە عێراق نۆ ڕۆژ پشوو ڕادەگەیێنرێت

ئاڤا نیوز

وەزارەتی پەروەردەی عێراق بڕیاریدا بە ڕاگرتنی دەوامی فەرمی لە قوتابخانەکاندا بۆ ماوەی 9 ڕۆژ، لە 5ـی تشرینی دووەمەوە تا 13ـی هەمان مانگ. ئەم پشووە هاوکاتە لەگەڵ هەڵبژاردنە پەرلەمانییەکەی عێراق و بەمەبەستی ئامادەکردنی قوتابخانەکانە وەک بنکەی دەنگدان بۆ پرۆسەکە.

وێنە گەورەکە: بڕیارە 11 تشرینی دووەمی ئەمساڵ هەڵبژاردنی خولی شەشەمی ئەنجوومەنی نوێنەرانی عێراق بەڕێوەبچێت، کۆمیسیۆنی باڵای سەربەخۆی هەڵبژاردنەکانیش بەردەوامە لە ڕێکارەکانی بۆ بەڕێوەبردنی پرۆسەکە.

نووسراوی فەرمی: بەپێی نووسراوێکی فەرمی کە بە واژۆی وەزیری پەروەردە، د. ئیبراهیم نامس جبوری، لە ڕێکەوتی 9ـی تەممووزی 2025 دەرچووە و ئاراستەی سەرجەم بەڕێوەبەرایەتییەکانی پەروەردە لە بەغدا و پارێزگاکان کراوە، وەزارەتی پەروەردە بڕیاریداوە بە تەرخانکردنی قوتابخانەکان بۆ پرۆسەی هەڵبژاردنە پەرلەمانییەکەی داهاتوو.

لە هەمان کاتدا: لە نووسراوەکەدا هاتووە، پێویستە ئەو قوتابخانانەی وەک بنکەی دەنگدان دیاریکراون، لە ڕێکەوتی 5ـی تشرینی دووەمی 2025 تا 13ـی تشرینی دووەمی 2025، ڕادەستی کۆمیسیۆنی باڵای سەربەخۆی هەڵبژاردنەکان بکرێن.