ئەنجوومەنی وەزیرانی هەرێمی كوردستان كۆ دەبێتەوە

ئاڤا نیوز

بە سەرپەرشتیی سەرۆكوەزیران مەسرور بارزانی، ئەنجوومەنی وەزیرانی هەرێمی كوردستان كۆ دەبێتەوە و تاووتوێی دوو پرس دەكات.

چیرۆکی سەرەکی: ڕۆژانی چوارشەممەی هەموو هەفتەیەك كۆبوونەوەی ئاسایی ئەنجوومەنی وەزیرانی هەرێمی كوردستان دەکرێت و تایبەت دەبێت بە دوا ڕێککەوتنی نێوان هەولێر و بەغدا و جێبەجێكردنی دەقی ڕێككەوتنەکە.

زانیاریی بە دەستهاتوو: بەپێی زانیارییەكانی ئاڤا میدیا، كۆبوونەوە كاتژمێر (10:00)ی سەرلەبەیانیی ڕۆژی چوارشەممە دەستپێدەكات و ماوەی دوو كاتژمێر دەخایەنێت و تاوتوێی ئەم دوو پرسە دەكات.

بڕگەی یەكەم: 

پێشهاتەكانی ئەم دواییەی تایبەت بەجێبەجێكردنی دواڕێككەوتن و لەیەكترتێگەیشتنی هاوبەشی هەردوو حكومەتی هەرێمی كوردستان و حكومەتی فیدراڵی كە پەسەند كراوە بە بڕیاری ئەنجوومەنی وەزیرانی هەردوولا سەبارەت بە دۆسیەی مووچە و شایستە داراییەكانی هەرێم و هەردوو دۆسیەی نەوت و داهاتی نانەوتی و میكانیزم و ڕێككاری تایبەت بە هەنگاوەكانی داهاتووی خستنە باری جێبەجێكردنی بڕگەكانی ڕێككەوتننامەكە لەلایەن وەزارەت و  لایەنە پەیوەندیدارەكان و لیژنە هاوبەشەكانی هەردوولا.

بڕگەی دووەم:

 خستنەڕووی كۆنووسی كۆبوونەوەی تایبەت بە جێبەجێكردنی دەقی ڕێككەوتننامەی نێوان حكومەتی هەرێمی كوردستان و حكومەتی فیدراڵی بەمەبەستی دانانی میكانیزمی ڕێكخستنی كارەكانی دەستەی پێوانەسازی و كۆنترۆڵی جۆریی هەرێمی كوردستان و گونجاندنی لەگەڵ دەقی ڕێككەوتننامەكە لەبەر ڕۆشنایی بڕیاری پێشووی ئەنجوومەنی وەزیرانی هەرێمی كوردستان لە كۆبوونەوەی ژمارە (147)ی 19ی2ی2025، بە نووسراوی سكرتاریەتی ئەنجوومەنی وەزیران ژمارە (3461) لە 10ی3ی2025.