لە ئاکرێ کەسێکی نەناسراو دەستڕێژی گوللە لە ژمارەیەک مانگا دەکات

ئاڤا نیوز

لە ناحیەی دینارتەی سەر بە قەزای ئاکرێ کەسێکی نەناسراو دەستڕێژی گوللە لە ژمارەیەک مانگا دەکات و دوو مانگا دەکوژێت. پۆلیسی ئاکرێش بۆ دۆزینەوەی تۆمەتبارەکە دەستی بە لێکۆڵینەوە کردووە.

چیرۆکی سەرەکی: دوێنێ لە ناحیەی دینارتە لە سنووری قەزای ئاکرێ، کەسێکی نەناسراو دوو مانگای هاووڵاتیەک لەبەردەم ماڵەکەی بە گوللەی دەمانچە دەکوژێت و شوێنەکە جێدەهێلێت.

لێدوانی فەرمی: سەربەست عەبۆ، خاوەنی مانگاکان بە ئاڤا میدیای ڕاگەیاند، "هەردوو مانگاکەی من لەبەردەم دەرگای ماڵەوە بوون کەسێکی نەناسراو بە گوللەی دەمانچە هەردووکیانی کوشت و ڕای کرد".

- "لە بنکەی پۆلیس  سکاڵامان تۆمارکردووە، بۆ ئەوەی ئەو کەسەی ئەم کارەی کردووە دەستگیر بکرێت و لێکۆلینەوەی لەگەڵ بکرێت".

- مانگاکان ئاوس بوونە و لەگەڵ کوشتنیان گوێرەکەی ناو سکیان مردوون.

پەیوەست بەم بابەتە: موقدەم عیماد حسێن، بەڕێوەبەری ڕاگەیاندنی بەڕێوەرایەتیی پۆلیسی ئاکرێ بە ئاڤا میدیای ڕاگەیاند، "سکاڵای هاووڵاتییەکە وەرگیراوە و لێکۆلینەوەمان دەستپێکردووە بۆ دۆزینەوە تۆمەتباران".

ئەوەی پێویستە بیزانیت: بە پێی ماددەی 482 ی یاسای سزادانی عێراقی مامەڵە لەگەڵ کەیسەکە دەکرێت.