بەغدا و هەولێر لەسەر سێ بابەت کۆدەبنەوە

ئاڤا نیوز

لیژنەی تەکنیکی هەرێمی کوردستان و حکومەتی فیدراڵ لەسەر سێ بابەتی تایبەت بە مووچە و داهات و هەناردە کردنەوەی نەوت لە بەغدا کۆدەبنەوە و ڕاپۆرتێکی هاوبەش ئامادە دەکەن.

چیرۆکی سەرەکی: دوای ئەوەی هەردوو ئەنجوومەنی وەزیرانی هەرێمی کوردستان و عێراق، یاداشتی لێکتێگەیشتنی نێوانیان پەسەند کرد، گفتوگۆکانی نێوان هەردوولا بەردەوامە بۆ جێبەجێکردنی ئەو یاداشتە، بۆ ئەم مەبەستەش شاندێکی تەکنیکی هەرێمی کوردستان لە بەغدان و لەسەر چەند پرسێکی تایبەت بە مووچە و داهات و هەناردەکردنەوەی نەوت کۆدەبنەوە، لە دەرەنجامی گفتوگۆکانیش ڕاپۆرتێکی هاوبەش ئامادە دەکرێت.

زانیاریی پەیامنێر: دەروون مەلا ناجی، پەیامنێری ئاڤا میدیا لە بەغدا گوتی: لیژنە تەکنیکییەکەی هەرێمی کوردستان بەسەر سێ لیژنە دابەش بوون و لەسەر سێ بابەت گفتوگۆ دەکرێت ئەوانیش بریتین لە: 

- هەناردەکردنەوەی نەوت.

- کورتهێنان لە پشکی هەرێمی کوردستان و پڕکردنەوەی بەپێی یاسای بودجە.

- داهاتی نانەوتی مانگانە بڕەکەی چەندە و چۆن کۆدەکرێتەوە و چۆن ڕادەستی حکومەتی عێراق دەکرێت.

زانیاریی زیاتر: هەردوو لیژنەی تەکنیکی هەرێمی کوردستان و عێراق جگە لەو بابەتانە لەسەر چەند پرسێکی تایبەت بە ژمێرکاری و وردبینی گفتوگۆ دەکەن، لەسەر کۆی بابەتەکان هەفتەی داهاتوو ڕاپۆرتێکی هاوبەش ئامادە دەکەن و پێشکەشی لیژنەی وزاری دەکەن بۆ ئەوەی ببرێتە کۆبوونەوەی ئەنجوومەنی وەزیران و دەنگی لەسەر بدرێت.

گۆشەیەکی دیکەی دیمەنەکە: بەپێی زانیارییەکانی دەروون مەلا ناجی، بەهۆی تەواو نەبوونی رێکارەکانی تەمویل کردن، دوێنێ پارەی مووچەی مانگی پێنج نەخرایە سەر حیسابی وەزارەتی دارایی و ئابووری هەرێمی کوردستان ، چاوەڕێ دەکرێت ئەمڕۆ ڕێکارەکان تەواو بکرێن و پارەکە ڕەوانە بکرێت، چونکە ئەو بابەتە هیچ بەربەستێکی بۆ دروست نەبووە.