شەڕە قسەی ترەمپ و ئۆباما دەست پێ دەکات: لە هەڵبژاردن ڕووسیا لە بەرژەوەندیی ترەمپ دەستتێوەردانی کرد

ئاڤا نیوز

باراک ئۆباما، سەرۆکی پێشووتری ئەمریکا، هەموو تۆمەتەکانی ترەمپ ڕەت دەکاتەوە، ئەمەش دوای ئەوەی ئۆبامای بە خیانەتکار تۆمەتبار کرد.

چیرۆکی سەرەکی: دۆناڵد ترەمپ، باراک ئۆبامای سەرۆکی پێشووتری ئەمریکای بە خیانەتکار و دەستکاریکردنی زانیارییەکانی تایبەت بە دەستتێوەردانی ڕووسیا لە هەڵبژاردنی سەرۆکایەتیی ساڵی 2016 تۆمەتبار کرد و ڕایگەیاند، دەبێت ئۆباما دادگایی بکرێت.

بڵاوکراوەی فەرمی: نووسینگەی باراک ئۆباما لە بەیاننامەیەکدا ڕایگەیاند: "هەموو ئەو تۆمەتانەی دراونەتە پاڵ ئۆباما دوورن لە ڕاستییەوە"، هاوکات دووپاتی کردەوە کە هەموو ئەو بەڵگانە ڕاستن کە باس لە دەستێوەردانی ڕووسیا لە هەڵبژاردنەکانی ساڵی 2016 لە بەرژەوەندیی ترەمپ دەکەن.

لەتەنیشت ئەم بابەتەوە: نووسینگەکە ئەوەشی ڕاگەیاند، لە نێوان ساڵانی 2019 بۆ 2023 چوار لێکۆڵینەوەی فەرمی لەو بارەیەوە کراون و ئەنجامی هەموویان ئەوەی پیشان داوە کە ڕووسیا لە هەڵبژاردنی سەرۆکایەتیی ساڵی 2016 لە بەرژەوەندیی ترەمپ دەستتێوەردانی کردووە. هاوکات لە ساڵی 2020دا، لیژنەی هەواڵگریی ئەنجوومەنی پیران بە سەرۆکایەتیی مارکۆ ڕوبیۆ، وەزیری دەرەوەی ئێستای ئەمریکا، بەڵگەنامەکانی پشتڕاست کردەوە.