شاندی تەکنیکی هەولێر و بەغدا لە کۆبوونەوەدان

ئاڤا نیوز

 

شاندێکی تەکنیکی وەزارەتی دارایی هەرێمی کوردستان لە بەغدان و لەگەڵ هاوتاکانیان گفتوگۆ دەکەن لەسەر کۆی پرسە داراییەکان و بەردەوامی بەبانکیکردنی مووچەی مووچەخۆران لە هەرێمی کوردستان.

 

وێنە گەورەکە: دوای لێکتێگەیشتنی نوێی نێوان هەولێر و بەغدا، ئێستا هەردووکیان لەڕێگەی لیژنەی هاوبەشەوە کار لەسەر دانانی میکانیزمی جێبەجێکردنی دەکەن، وردەکارییەکانی بەبانکیکردنی مووچە و تەرخانکراوە داراییەکان، تاوتوێ دەکەن.

 

لێدوانی فەرمی: ڕێباز حەملان، یاریدەدەری سەرۆکوەزیرانی هەرێمی کوردستان، لە گەشتی هەواڵی ڕۆژان بەشداربوو و گوتی، "سەرۆکوەزیران مەسرور بارزانی لەسەر هێڵە و سەرپەرشتی پرۆسەکە دەکات، بۆ ئەوەی هیچ گرفتێک نەمێنێت و کێشە بۆ خەرجکردنی مووچە دروست نەبێت."

 

ئەمەش بزانە: شاندەکەی وەزارەتی دارایی هەرێمی کوردستان پێکهاتوونە لە بەڕێوەبەری گشتیی باج، بەڕێوەبەری گشتیی ژمێرکاری، بەڕێوەبەری گشتیی بانکە بازرگانییەکان و وەفدێکی یاوەریان، هاوکات دوو کەس لە تیمی  هەژماری من و سێ کەس لە چاودێریی دارایی هەرێمی کوردستان لەنێو شاندەکەدان، پێداچوونەوە لەسەر بەبانکیکردنی مووچەی موووچەخۆران، تەرخانکراوە داراییەکانی هەرێمی کوردستان و داهاتی نانەوتی گفتوگۆ دەکەن.