ئەنجوومەنی وەزیران: دەبێت حكومەتی عێراق دەستبەجێی مووچە بنێرێت

ئاڤا نیوز

ئەنجوومەنی وەزیرانی هەرێمی كوردستان ڕایدەگەیێنێت، دەبێت حكومەتی عێراق دەستبەجێ مووچە و شایستە داراییەکانی خەڵکی کوردستان بنێرێت، کە تا ئێستا نەیانناردووە و مووچەخۆرانی هەرێم، سێ مانگە بێ بەشکراون لە شایستەی دارایی خۆیان.

چیرۆکی سەرەکی: ڕۆژی چوارشەممە 2025-07-23، بە سەرپەرشتی سەرۆکوەزیران مەسرور بارزانی، ئەنجوومەنی وەزیرانی هەرێمی کوردستان کۆبووەوە و چەند پرسێكی تاووتوێ كرد.

ڕاگەیێنراوی فەرمی: بەپێی ڕاگەیێنراوێكی ئەنجوومەنی وەزیران، تەوەری سەرەكیی كۆبوونەوەكە تایبەت بووە بە تاوتوێکردنی پێشهاتەکانی ئەم دواییەی جێبەجێکردنی دوا ڕێککەوتن و لەیەکتێگەیشتنی هاوبەشی نێوان هەردوو حکومەتی هەرێمی كوردستان و حکومەتی فیدراڵ، کە هەفتەی ڕابردوو لەلایەن ئەنجوومەنی وەزیرانی هەردوولا پەسەند کراوە و تایبەتە بە مووچە و شایستە داراییەکانی هەرێمی كوردستان و هەناردەکردنەوەی نەوت و داهاتیی نانەوتی و میکانیزم و ڕێکاری تایبەت بە هەنگاوەکانی هاتوو لە ڕێککەوتننامەکە لەلایەن وەزارەت ولایەنە پەیوەندیدارەکان و لیژنە هاوبەشەکانی هەردوولا.

ناوەڕۆکی کۆبوونەوەکەی ئەنجوومەنی وەزیرانی کوردستان ئەمانەشی تێدابوو:

٠ هەرێمی کوردستان هەموو پابەندییەکی خۆی بە تەواوی جێبەجێ کردووە، سەبارەت بە بەشی گەنجینەی فیدراڵ لە داهاتی نانەوتی هەرێمی کوردستان، وەزارەتی دارایی و ئابووری هەرێمی کوردستان بڕی 120 ملیار دیناری بە کاش خستووەتە سەر هەژماری وەزارەتی دارایی فیدراڵ وەک لە ڕێککەوتنە هاوبەشەکە هاتووە.

٠ لیستی پەسەندكراوی هەردوو مانگی ئایار و حوزەیران و تەرازووی پێداچوونەوەی مانگانە بۆ بەغدا نێردراوە و هەرێمی کوردستان هەموو داهات و خەرجییەکانی، شەفافانە خستووەتە بەردەمیان.

٠ لیژنەی تەکنیکیی هەردوو وەزارەتی سامانە سرووشتییەكان و نەوت، لەسەر پڕۆتۆکۆلی دەستپێکردنەوەی هەناردەی نەوتی هەرێم لەڕێگەی کۆمپانیای سۆمۆ گەیشتوونەتە لەیەکگەیشتنی هاوبەش بۆ ئەو بڕە نەوتەی کە ئێستا لە هەرێمی کوردستان بەرهەم دێت، چونکە بەهۆی هێرشە درۆنییە تیرۆریستی و ناڕەواکانی ئەم دواییە بۆ سەر کێڵگە نەوتییەکانی هەرێم ، بەرهەمهێنانی نەوت، بە شێوەیەکی بەرچاو لە کێڵگەکان کەمی کردووە.

٠ دەبێت حكومەتی عێراق دەستبەجێی مووچە و شایستە داراییەکانی خەڵکی کوردستان بنێرێت، کە تا ئێستا نەیانناردووە و مووچەخۆرانی هەرێم، سێ مانگە بێ بەشکراون لە شایستەی دارایی خۆیان، کە مافێکی دەستووریی و یاسایی خۆیانە.

٠ ئەنجومەنی وەزیران، بەڕێز و پێزانینێکی زۆرەوە، هەڵوێستی بەرپرسانە و خۆراگریی خەڵکی هەرێمی کوردستان بەرز دەنرخێنێت.

٠ داوا لە دەزگاکانی ڕاگەیاندنی کوردستان دەكەین، کە بەشێوەیەکی ڕاستگۆییانە و بەرپرسانە کار بکەن و نەبنە سەکۆیەک بۆ بڵاوکردنەوەی زانیاری ناڕاست و دوور لە تێکدان و خراپەکاری و چەواشەکاری ئەرکی خۆیان بەجێ بگەیەنن.