ئاڤا میدیا سۆراغی دوو گەنجی کورد لە بەغدا دەکات

ئاڤا نیوز

دوو گەنجی کورد لە بەغدا بێسەروشوێنن و ئاڤا میدیا لەڕێگەی دوو لیژنەی پەرلەمانی عێراقەوە سۆراغیان بۆ دەکات.

چیرۆکی سەرەکی: شەوی 19 لەسەر 20ـی ئەم مانگە، دوو گەنجی دانیشتووی گوندی پیرداود لە سنووری ناحیەی شەمامک لە پارێزگای هەولێر، بەمەبەستی کارکردن بەشێوەی بەڵێندەرایەتی لە باڵەخانەیەکدا ڕوویان کردووەتە شاری بەغدا، بەڵام لەناکاو دەنگیان نامێنێت و هیچ سۆراغێکیشیان نییە، برای یەکێک لە گەنجەکان بە ئاڤای گوت، دوایینجار کە قسەم لەگەڵ براکەمدا کردووە، کاتژمیر 5 و 7 خولەکی ئێوارەی ڕۆژی یەکشەممە 2025-07-20 بووە.

ئەوەی پێویستە بیزانیت: ئاڤا میدیا ناو و زانیارییەکانی  ئەو دوو گەنجە، لەگەڵ مۆدێل و ڕەنگ و ژمارەی ئۆتۆمبێلەکەیانی گەیاندووەتە لیژنەی مافی مرۆڤ، لیژنەی بەرگری و ئاسایشی پەرلەمانی عێراق.

لێدوانە فەرمییەکان: ئاڤا میدیا پەیوەندی بە دوو ئەندامی پەرلەمانی عێراقەوە کرد، تاوەکو سۆراغی ئەو دوو گەنجە بکەن.

مەریوان قەرەنی، ئەندامی لیژنەی بەرگریی و ئاسایشی پەرلەمانی عێراق بە ئاڤای ڕاگەیاند: بەپێی ئەو زانیارییانەی بۆتان ناردووم، هەوڵەکانمان بۆ دۆزینەوەی ئەو دوو گەنجە دەخەینە گەڕ و لەگەڵ لایەنە پەیوەندیدارەکان قسە دەکەین.

جوان عەبدوڵڵا، ئەندامی لیژنەی مافی مرۆڤ لە پەرلەمانی عێراق بە ئاڤای گوت: هەموو هەوڵێکمان بۆ دۆزینەوەی ئەو دوو گەنجە دەخەینە گەڕ، هیوادارین بە زووترین کات بگەڕێنرێنەوە بۆ نێو خێزان و کەسوکاریان.

زانیاریی زیاتر: ئەو دوو گەنجە بە ناوەکانی جێگر موحسین حوسێن، تەمەن 23 ساڵ و ئەحمەد ئەنوەر پیرداود، تەمەن 30 ساڵن، بە ئۆتۆمبێلێکی جۆری ئەلتیمای تایبەت-ڕەنگ سپی چوونەتە بەغدا.