پرۆژەیەکی ئاوی خواردنەوە لە ناحیەی وەرتێ جێبەجێدەکرێت

ئاڤا نیوز

 لە ناحیەی وەرتێی سنووری ئیدارەی سەربەخۆی سۆران پرۆژەیەکی گرنگی ئاوی خواردنەوە دەچێتە بواری جێبەجێکردن، نزیکەی 300 ماڵ لێی سوودمەند دەبن.

چیرۆکی سەرەکی: لە ماوەی ڕابردوو هەندێک شوێنی ناحیەی وەرتێ کێشەی کەمئاویان هەبوو، لەلایەن بەڕێوەبەرایەتیی ئاوی سۆران پرۆژەیەکی تایبەتی ئاوی خوارنەوەیان بۆ جێبەجێدەکرێت کە نزیکەی 300 ماڵ لێی سوودمەند دەبن.

لێدوانی فەرمی: یوسف ئەحمەد، بەڕێوەبەری ئاوی سۆران بە ئاڤای وت، پرۆژەکە پێکدێت لە دانانی تۆڕی ئاوی خوارنەوە بە درێژایی پێنج هەزار و 566 مەتر، هاوکات بۆری بۆ دانراوە لەگەڵ غەتاس و دروستکردنی دوو عەمباری کۆنکرێتی ئاو، لەئێستادا عەمبارەکان دەست بە دروست کردنیان کراوە.

زانیاریی زیاتر: بەڕێوەبەری ئاوی سۆران دەڵێت، گوژمەی پرۆژەکە 280 ملیۆن دینارە و لەسەر بودجەی وەزارەتی شارەوانی و گەشتوگوزار لەلایەن بەڕێوبەرایەتیی ئاوی سۆران بەشێوەیەکی راستەوخۆ جێبەجێ دەکرێت.

ئەوەی پێویستە بیزانیت: پێشبینی دەکرێت بە دوو مانگ کارەکانی تەواو بکرێت، بە تەواوبوونی ئەم پرۆژەیە 300 ماڵ لە سنووری ناحیەی وەرتێ سوومەند دەبن و ئاوی خواردنەوە زیاد دەکات بۆ ناوچەکە.