ماستەرپلانی گەشتیاریی هاوینەهەواری بێخاڵ بە ساڵێك تەواو دەكرێت

ئاڤا نیوز

ماستەرپلانی گەشتیاری لە ئیدارەی سەربەخۆی سۆران دەستپێدەكات، سەرەتای جێبەجێكردنی كارەكانیش لە هاوینەهەواری بێخاڵ دەبێت و لە ساڵێكدا تەواو دەكرێت.

چیرۆكی سەرەكی: بە بڕیاری مەسرور بارزانی، سەرۆکی حکومەتی هەرێمی کوردستان، ماستەرپلانی گەشتیاری لە ئیدارەی سەربەخۆی سۆران دەستپێدەکات. پرۆژەی دیزاینکردنەوەی هاوینەهەواری بێخاڵ كە بە ستانداردێكی جیهانی و مۆدێرن دیزاین كراوە، لەلایەن کۆمپانیای ناوخۆیی جێبەجێ دەکرێت؛ هەفتەی داهاتوو دەست بە کارەکانی دەکرێت و لە ماوەی ساڵێکدا تەواو دەکرێت.

ڕاگەیێنراوی فەرمی: بەپێی ڕاگەیێنراوی فەرمیی حكومەتی هەرێمی كوردستان، دیزاینکردنەوەی هاوینەهەوارەکە جگە لەوەی سیمایەکی سەرنجڕاکێشتر بە ناوچەکە دەبەخشێت، جموجۆڵی گەشتیاریش زیاد دەکات و داهاتی ئابووریی ناوچەکەش دەبووژێنێتەوە.

باكگراوند: لەپێناو خزمەتکردنی زیاتری هاووڵاتیان و گەشتیاران، حکومەتی هەرێمی کوردستان، چەندین شوێنی گەشتیاری لە ناوچە جیاوازەکانی کوردستان نۆژەنکردووەتەوە و دروستی کردووە؛ ناوچە گەشتیارییەکانی ئیدارەی سەربەخۆی سۆرانیش یەکێک دەبێت لە ماستەرپلانەکانی حکومەتی هەرێمی کوردستان، بە ئامانجی ئەوەی كەرتی گەشتیاری ببێتە سەرچاوەیەكی گرنگی داهات بۆ هەرێمی كوردستان.