هەولێر و بەغدا سیستمی کواڵیتی کۆنترۆڵ هاوتا دەکەن

ئاڤا نیوز

هەردوو حكومەتی هەرێمی كوردستان و حكومەتی فیدراڵ، لەسەر یەكخستنی سیستمی دەستەی پێوانەسازی و كۆنتڕۆڵی جۆری، ڕێككەوتوون، ئەنجوومەنی وەزیرانی کوردستانیش بە كۆی دەنگ ڕێککەوتنەکەی پەسەند کرد، لەمەودوا لە هەموو هەرێمی کوردستان و عێراق یەک سیستمی هاوبەش بۆ داخڵکردنی کاڵا و بەرهەم و دەرمان و هەموو شتێک پەیڕەو دەکرێت.

چیرۆکی سەرەکی: لە كۆبوونەوەی ئەمڕۆی ئەنجوومەنی وەزیرانی هەرێمی كوردستان، دەقی ڕێككەوتننامەی نێوان هەردوو حكومەتی هەرێمی كوردستان و حكومەتی فیدراڵ لەلایەن ئەو لیژنە هاوبەشە خوێندرایەوە كە لە دەستەی پێوانەسازی و كۆنتڕۆڵی جۆریی وەزارەتی پلاندانان، بەڕێوەبەرایەتیی گشتیی گومرگەكانی سەر بە وەزارەتی دارایی و ئابووری، بەڕێوەبەرایەتیی گشتیی گەشەپێدانی وەزارەتی بازرگانی و پیشەسازی و وەزارەتی ناوخۆ، پێكهاتووە.

زانیاریی بەدەستهاتوو: هەردوو حكومەتی هەرێمی كوردستان و فیدراڵ ڕێككەوتوون بە دانانی میكانیزمی هەماهەنگی و هاریكاریی نێوان هەردوو دامەزراوەی پێوانەسازی و كۆنتڕۆڵی جۆریی فیدراڵ و هەرێمی كوردستان، لە چوارچێوەی تایبەتمەندی و دەسەڵاتە دەستوورییەكاندا، بەجۆرێك؛ لە چوارچێوەی ڕێككەوتنە هاوبەشەكە، بڕوانامەی پشكنینی كەلوپەلە هاوردەكراوەكان، بەرهەمەكان، دەرمان و كەرەستەی بیناسازی و شتومەكەكانی دیكە، لەنێوان هەردوو دامەزراوەكە یەكدەخرێت و بە هەمان سیستم كاردەكەن.

ئەوەی پێویستە بیزانیت: لەمەودا دەستەی پێوانەسازیی و کۆنتڕۆڵی جۆریی هەرێمی کوردستان، لایەنی تایبەتمەند دەبێت بە پەیڕەوكردنی هەمان ئەو سیستمەی كە دەزگا هاوتاكەی لە حكومەتی فیدراڵ پەیڕەوی دەكات.

هۆكارە زانراوەكان: لەماوەی ڕابردوودا بەهۆی جیاوازی سیستمی كاركردنی هەردوو دەزگای دەستەی پێوانەسازیی و كۆنتڕۆڵی جۆریی هەرێمی كوردستان و عێراق، چەندین كەلوپەل لەنێوان پارێزگاكان ئاڵوگۆڕی پێ دەكرا و دەگوازرایەوە بێ ئەوەی بڕوانامەی كوالێتی كۆنتڕۆڵیی هەبێت، ئەمەش جگە لە زیانە ماددییەكەی، مەترسیی ڕاستەقینەی لەسەر سەلامەتیی گشتی دروست دەكرد.