هێڵی ئاسمانیی عێراقی گەشتەکانی بۆ مەشهەد دەستپێدەکاتەوە

ئاڤا نیوز

وەزارەتی گواستنەوەی عێراق ڕایدەگەیێنێت، لە هەفتەی داهاتووەوە گەشتە ئاسمانییە ڕاستەوخۆکانی کۆمپانیای گشتیی هێڵی ئاسمانیی عێراقی بۆ شاری مەشهەدی ئێران دەستپێدەکەنەوە.

ئەوەی پێویستە بیزانیت: بەهۆی جەنگی 12 ڕۆژەی نێوان ئیسرائیل و ئێران لە مانگی حوەزیرانی ڕابردوو، سەجەم گەشتە ئاسمانییەکان لە وڵاتانەوە بۆ ئێران و لەناوخۆی ئێرانیشەوە وەستا، دوای ئاساییبوونەوەی دۆخەکە بەشێوەیەکی پلەبەندی گەشتە ئاسمانییەکان بۆ ئەو وڵاتە دەستیان پێکردەوە، ڕۆژ بە ڕۆژیش گەشتەکان ئاسایی دەبنەوە.

ڕاگەیێنراوی فەرمی: بەگوێرەی ڕاگەیێنراوی وەزارەتی گواستنەوەی عێراق، گەشتەکان لە هەفتەی داهاتووەوە بە ڕێژەی چوار گەشت لە هەفتەیەکدا لە فڕۆکەخانەکانی بەغدای نێودەوڵەتی و نەجەفەوە ئەنجام دەدرێن.

لێدوانی فەرمی: ئەندازیار مەناف عەبدولمونعیم، بەڕێوەبەری گشتیی کۆمپانیای هێڵی ئاسمانیی عێراقی، جەختی کردەوە کە ئەم دەستپێکردنەوەیە تەواوکەری گەڕانەوەی گەشتە ئاساییەکانە بۆ شارەکانی ئێران، کە بەم دواییانە بە ئەنجامدانی دوو گەشت لە هەفتەیەکدا بۆ تاران-ی پایتەخت دەستی پێکرد. هەروەها ئاماژەی بەوە کرد کە هەموو پێداویستییەکانی سەلامەتی و ئامادەیی کارپێکردن بە هەماهەنگیی تەواو لەگەڵ لایەنە پەیوەندیدارەکان جێبەجێ کراون.

لەلایەکی دیکەوە: وەزارەتی گواستنەوە دووپاتی دەکاتەوە کە هێڵی ئاسمانیی عێراقی بەردەوامە لە جێبەجێکردنی پلانە ستراتیژییەکانی بۆ زیادکردنی گەشتەکان و فراوانکردنی تۆڕی ئاسمانیی خۆی، بۆ ئەوەی پێگەی "باڵندە سەوزەکە" وەک نوێنەری نیشتمانی لە بواری گواستنەوەی ئاسمانیدا بەهێزتر بکات.