بەڕێوەبەری کشتوکاڵی ئاکرێ: لە کابینەی نۆیەمدا بەرهەمی کشتوکاڵی ئاکرێ 200% زیادیکردووە

ئاڤا نیوز

یەکێک لە ستراتیژەکانی کابینەی نۆیەم بایەخدان بووە بە کەرتی کشتوکاڵ، ئەنجامی ئەو بایەخپێدانە، بووەتە هۆی زیادبوونی بەرهەمی کشتوکاڵی بە ڕێژەی 200% لە قەزای ئاکرێ. ئەمەش بە وتەی بەڕێوەبەری کشتوکاڵی ئەو قەزایە.

وێنە گەورەکە: ئاکرێ بە چەندین بەرهەمی کشتوکاڵی بەناوبانگە لەوانە، سماق، هەنجیر و برنج. ساڵانە بەرهەمی ئەو قەزایە دەگاتە شارەکانی ناوەڕاست و خوارووی عێراق، هاوکات هەناردەی وڵاتانی ئەوروپا و کەنداو دەکرێت.

لێدوانی فەرمی: فازڵ مستەفا، بەڕێوەبەری کشتوکاڵی ئاکرێ بە ئاڤا میدیای وت، لەماوەی دەستپێکی کابینەی نۆیەمدا لە چەند ڕێگەیەکەوە توانرا گۆڕانکاری گەورە لە کەرتی کشتوکاڵی ئاکرێ بکرێت، بۆ نموونە بایەخ بە جووتیاری نموونەیی درا و ئاسانکاری زۆریان بۆ کرا. ڕێکارەکانی بە بازاڕکردن گۆڕانکاری زۆریان لێ دروست بوو. ڕێگای بەشی هەرە زۆری گوندەکان قیرتاو کران، ئەمەش وایکرد کارئاسانی بۆ جووتیاران دروست بێت، پێشووتر ئەگەر جووتیار ڕۆژانە یەک جار بەرهەمی بهێنایە بۆ عەلوە، ئێستا ڕۆژانە ئەو بەرهەمەی هەبێت دەیهێنێت.

ژمارەکان وا دەڵێن: بەپێی داتاکانی بەڕێوەبەرایەتی کشتوکاڵی ئاکرێ ژمارەی داری سماق لە ئاکرێ دەگاتە سێ ملیۆن و 500 هەزار، ڕێژەی 70%ـی دەکەوێتە ناوچەی دینارتە. ساڵانە لە ئاکرێ چوار تا پێنج هەزار تۆن سماق بەرهەمدێت. سماق سێ جۆری هەیە، سماقی سپی باشترین جۆریەتی، سماقی مامناوەند باریکی، سماقی سوور.

لەلایەکی دیکەوە: بەڕێوەبەری کشتوکاڵی ئاکرێ دەڵێت: پێش کابینەی نۆیەم، تەنیا 27 هەزار داری هەنجیر لە ئاکرێ هەبوو، بەڵام ئەمساڵ ژمارەی داری هەنجیر گەیشتووەتە 250 هەزار دار، بەرهەمی ساڵانەی هەنجیری ئاکرێ دەگاتە هەشت هەزار تۆن.