مەشهەدانی بۆ نەتەوەیەکگرتووەکان: کۆمەڵکوژی لە غەززە ڕابگرن

ئاڤا نیوز

سەرۆکی پەرلەمانی عێراق پەیامێکی "تایبەت" و "بەپەلە"ـی بۆ ئەمینداری گشتیی نەتەوە یەکگرتووەکان ناردووە و تێیدا داوای لە ناوبراو و ئەندامانی نەتەوەیەکگرتووەکان کردووە سنوورێک بۆ "کۆمەڵکوژی" لە کەرتی غەززە دابنێن.

چیرۆکی سەرەکی: مەشهەدانی لە پەیامێکی تایبەتدا داوا لە ئەنتۆنیۆ گۆتێرێش، ئەمینداری گشتیی نەتەوە یەکگرتووەکان و وڵاتانی ئەندام لە نەتەوەیەکگرتووەکان دەکات بەپەلە کۆمەڵکوژی لە غەززە ڕابگرن.

ڕاگەیێنراوی فەرمی: مەحموود مەشهەدانی لە پەیامەکەیدا دەڵێت: "دووپاتی دەکەینەوە نەتەوەیەکگرتووەکان دەبێت دەنگێکی بەرزتر و کردارێکی گەورەتری هەبێت سەبارەت بە کارەساتی گەلەکەمان لە غەززە بۆ ئەوەی بەڕاستی بتوانێت لە ئاست بەرپرسیارێتی خۆیدا بێت بۆ ڕزگارکردنی گەلێک لە پاکتاوی نەتەوەیی ناڕەوا و ڕەگەزپەرستانە، هەروەها بتوانێت پارێزەری ماف و کەرامەتی مرۆڤ بێت.

ئەوەی پێویستە بیزانیت: 658 ڕۆژە جەنگی ئیسرائیل بۆ سەر کەرتی غەززە بەردەوامە و نزیکەی پێنج مانگە ئیسرائیل سەرجەم دەروازە سنوورییەکانی کەرتی غەززەی داخستووە، بەگوێرەی حکومەتی خۆجێی کەرتەکە زیاتر لە دوو ملیۆن و 400 هەزار هاووڵاتی غەززە ڕووبەڕووی برسێتی بوونەتەوە.