خانووە زێدەڕۆکانی چەند گوندێکی سنووری سلێمانی تاپۆ دەکرێن

ئاڤا نیوز

 

سەرۆکی لیژنەی ناوەندی بۆ تاپۆکردنی خانووە زێدەڕۆکان ئاشکرای کرد، نەخشەی وردی خانووە زێدەڕۆکانی دەیان گوند لە سنووری پارێزگای سلێمانی تاپۆیان بۆ دەرچووە.

 

ئەوەی پێویستە بیزانیت: لە چوارچێوەی ڕووپێوکردنی گوندەکانی ناو سنووری پارێزگای سلێمانی بۆ ئامادەکردنی نەخشەیەک بۆ خانووە زیادەڕۆکان، لەلایەن لیژنەیەکی پسپۆڕ لە ئەندازیارانی تەلارسازیی شارەوانیی سلێمانییەوە کاری دیزاینیان بۆ دەکرێت تا بە زووترین کات ڕێکارەکانی تاپۆکردنیان بۆ بکرێت.

 

لێدوانی فەرمی: دیلمان لەتیف ڕەشید، سەرۆکی لیژنەی ناوەندی بۆ تاپۆکردنی خانووە زێدەڕۆکان لە پارێزگای سلێمانی ڕایگەیاند: تاپۆکردنی گوندەکانی "خاک، دابان، عەزیزئاوا، کانی سەفەر و رازیانەی کانی شینکە" لە هەفتەی داهاتووەوە دەکەوێتە واری جێبەجێکردنەوە و دواتریش گوندەکانی دیکە بەپێی نەخشەکە دەکرێن.

 

مەرجەکانی: یەکێک لە مەرجەکانی تاپۆکردن ئەوەیە کە داواکار خاوەنی بینای خانووەکە بێت، بۆیە ئەگەر کەسێک لە دوای داواکاریکردن خانووەکەی فرۆشتبێ، لە کاتی سەردانی لیژنە لاوەکییەکاندا، کڕیارەکە لە خانووەکەدا بێت ئەوا تاپۆکردنی خانووەکە ڕەتدەکرێتەوە، بۆیە نابێت مامەڵە بەو خانووانەوە بکرێت تاوەکو تاپۆ دەکرێن. 

 

زانیاریی زیاتر: هەر هاونیشتیمانیەک لە ماوەی یاساییدا داواکاری پێشکەش بە پارێزگای سلێمانی کردبێت، پێویستە کۆپی "کارتی نیشتمانی" یان "ڕەگەزنامە و پێناس"ـی خۆیان و هاوژینیان ئامادە بکەن.