دوو هاوپەیمانی لیستی ناوی بەربژێرەکانیان بۆ کۆمیسیۆن ناردووە

ئاڤا نیوز

 

هاوپەیمانیی هەرێمی کوردستان و هاوپەیمانیی سەردەم لە سێ پارێزگای هەرێمی کوردستان، لیستی ناوی بەربژێرەکانیان بۆ کۆمیسیۆن ناردووە.

 

وێنە گەورەکە: دوو ڕۆژ ماوە بۆ تەواوبوونی وادەی پێشکەشکردنی ناوی بەربژێرانی  هاوپەیمانی، حیزب و بەربژێرە سەربەخۆکان بۆ هەڵبژاردنی پەرلەمانی کوردستان، تاوەکو ئێستا دووهاوپەیمانی، دوو حیزب و 11 بەربژێر لە هەولێر، 13 بەربژێر لە سلێمانی و  12 بەربژێر لە دهۆک ناوەکانیان پێشکەشی کۆمیسیۆن کردووە. 

 

لێدوانی فەرمی: "دوو حیزب لە سلێمانی و هەڵەبجە ناوی خۆیان تۆمارکردووە، نابێت هیچ هاوپەیمانی و حیزبێک ڕێژەی یاسایی دانانی بەربژێر لەهەر بازنەیەکی هەڵبژاردن تێبپەڕێنێت، واتە ئەگەر بازنەکە 34 کورسی بێت، ئەوا بۆیان هەیە ناوی 68 بەربژێر تۆماربکەن."
جومانە غەلای گوتەبێژی کۆمیسیۆنی باڵای سەربەخۆی هەڵبژاردنەکانی عێراق ئەوەی بە ئاڤا نیوز گوت.

 

ئەوەی پێویستە بیزانیت: هاوپەیمانیی هەرێمی کوردستان، لەلایەن محەممەدی حاجی مەحموود سەرۆکایەتی دەکرێت،  پێکهاتووە لە (پارتی سۆسیال دیموکرات، حیزبی شیوعی و حیزبی زەحمەتکێشان)، هاوپەیمانیی سەردەم لەلایەن عەبدوڵڵا حاجی مەحموودی برای سەرپەرشتی دەکرێت لە (یەکێتیی نەتەوەیی، پارتی ڕەنجدەرانی کوردستان و پارتی پارێزگارانی کوردستان) لەگەڵن.

 

 گۆشەیەکی دیکەی دیمەنەکە: ئەم ئامادەکارییانەی کۆمیسیۆن لە کاتێکدایە گەورەترین پارتی هەرێمی کوردستان (پارتی دیموکراتی کوردستان) کە لە خولی پێنجەمی پەرلەمان 45 کورسی هەبوو، ناڕەزایی لە شێوازی هەڵبژاردن هەیە.