دەستەی ناوچە کوردستانییەکان: بڕیاری قەدەغەکردنی زمانی کوردی سەرپێچی یاسا و دەستوورە

ئاڤا نیوز

دەستەی گشتیی ناوچە کوردستانیەکانی دەرەوەی ئیدارەی هەرێمی کوردستان، ڕایدەگەیەنێت، بڕیاری ڕێگریکردن لە وەڵامدانەوەی قوتابیان بە زمانی کوردی، پێشهاتێکی مەترسیدارە و سەرپێچی یاسا و دەستوورە.

چیرۆکی سەرەکی: بڕیارێکی وەزارەتی خوێندنی باڵای عێراق کە ئاڕاستەی زانکۆ حکومی و تایبەتەکانی کەرکووک، موسڵ و دیالە کراوە، سەرجەم زانکۆکان پابەند دەکات زمانی فەرمی لە پرسیاری تاقیکردنەوەکان عەرەبی و ئینگلیزییە و بەهەموو شێوەیەک زمانی کوردی لە وەڵامدانەوەی تاقیکردنەوەکان قەدەغە دەکات، ئەمەش کاردانەوەی زۆری بەدوای خۆیدا هێناوە.

ڕاگەیێنراوی فەرمی: دەستەی گشتیی ناوچە کوردستانیەکانی دەرەوەی ئیدارەی هەرێمی کوردستان ڕایدەگەیەنێت، بڕیاری قەدەغەکردنی زمانی کوردی و ڕێگریکردن لە قوتابیان کە بە زمانی کوردی وەڵامی تاقیکردنەوەکان بدەنەوە، سەرپێچی ڕوونی مادەی چواری دەستووری عێراقە، لە هەمان کاتدا پێشهاتێکی مەترسیدارە.

لەدرێژەی ڕاگەیێنراوەکەی دەستەی گشتیی ناوچە کوردستانیەکانی دەرەوەی ئیدارەی هەرێمی کوردستان هاتووە: 

٠ لە ناوچە کوردستانیەکان ساڵانە ئەم گرفتە بۆ فێرخوازانمان دروست دەکرێت، بەڵام ئەوەی ئەم جارە ڕووبەری گرفتەکەی فراوانتر کردووە.

٠ ئێمە لە دەستەی ناوچە کوردستانیەکان، هەر هەنگاوێک پێچەوانەی دەستوور بێت ڕەتیدەکەینەوە.

٠ حکومەتی عێراق لە کەمتر لە دوو مانگدا دوو بڕیاری نادەستووری لە ناوچە کوردستانیەکان پیادە کردووە ، لە دروستکردنی قەزای قەرەتەپە و بڕیاری قەدەغەکردنی وەڵامدانەوەی تاقیکردنەوە بە زمانی کوردی.

٠ ئەم هەنگاوانە مەترسیدارن و گومان لە جدیەتی حکومەتی عێراق زیاتر دەکات بۆ چارەسەرکردنی کێشەکانی ناوچە کوردستانیەکان.

٠ داوا لە نوێنەرانمان لە بەغدا دەکەین هەریەک لە سەرۆک کۆمار، وەزیرەکان و ئەندامانی پەرلەمان هەوڵەکانیان بخەنە گەڕ  بە ئامانجی چارەسەر کردنی ئەم گرفتانە، دەسەڵاتی یاسایی و دەستووری خۆیان پیادە بکەن، لە پێناو پاراستنی گیانی هاوبەشێتی لە ناوچە کوردستانیەکان و جێبەجێکردنی مادەی 140ـی دەستوور.