لەنیوەی ئەمساڵ عێراق زیاتر لە 18هەزار ئۆتۆمبێلی چینی هاوردە کردووە

ئاڤا نیوز

عێراق لە ماوەی شەش مانگی یەکەمی ئەمساڵدا، زیاتر لە 18 هەزار ئۆتۆمبێلی لە وڵاتی چینەوە هاوردە کردووە، 10%ـی ئۆتۆمبێلی کارەبایی 'هایبرێد' بووە.

چیرۆکی سەرەکی: بەپێی ڕاپۆرتێکی دەزگای "عێراقی داهاتوو" بۆ توێژینەوە و ڕاوێژکاریی ئابووری، هەناردەی ئۆتۆمبێلی چینی بۆ وڵاتانی ڕۆژهەڵاتی ناوەڕاست لە نیوەی یەکەمی ساڵی 2025ـدا گەشەیەکی بەرچاوی تۆمارکردووە، بە جۆرێک ژمارەی ئۆتۆمبێلە هەناردەکراوەکان بە ڕێژەی 65% بەرز بووەتەوە و گەیشتووەتە زیاتر لە 584 هەزار ئۆتۆمبێل، لە هەمان ماوەی ساڵی 2024 ـدا گەیشتە 353 هەزار ئۆتۆمبێل.

ژمارەکان وادەڵێن: ڕاپۆرتەکە ئاماژەی بەوەش کردووە، کۆی بەهای ئەم ئۆتۆمبێلانە گەیشتووەتە نزیکەی 7.7 ملیار دۆلار، لە کاتێکدا لە نیوەی یەکەمی پارساڵدا 4.5 ملیار دۆلار بووە، عێراق زیاتر لە 18 هەزار ئۆتۆمبێلی چینی هاوردە کردووە، لە هەمان ماوەی ساڵی 2024ـدا، نزیکەی 10 هەزار ئۆتۆمبێلی هاوردەکردبوو.

ئه‌وه‌ی پێشبینی ده‌كریت: بەپێی پێشبینییەکانی نێو ڕاپۆرتەکە، ڕەنگە هەناردەی ئۆتۆمبێلی چین بۆ ڕۆژهەڵاتی ناوەڕاست تا کۆتایی ساڵی 2025 سنووری یەک ملیۆن تێبپەڕێنێت، ئەمەش بەهۆی خواستی بەردەوام و نرخە کێبڕکێکارەکانەوەیە، بەتایبەتی لە بواری ئۆتۆمبێلی کارەباییدا.