د. شاخەوان عەبدوڵڵا: بڕیاری قەدەغەکردنی وەرگێڕانی پرسیارەکان بە زمانی کوردی کاری پێ ناکرێت

ئاڤا نیوز

ئەو نووسراوەی لە وەزارەتی خوێندنی باڵای عێراق بۆ قەدە‌غەکردنی وەرگێڕانی پرسیارەکان دەرچوو، هەڵوەشایەوە، جێگری سەرۆکی ئەنجوومەنی نوێنەرانی عێراق لەوبارەیەوە دەڵێت 'ئەو بڕیارە ڕاگیراوە و کاری پێناکرێت'.

وێنە گەورەکە: ڕۆژی 15-7-2025، لەلایەن وەزارەتی خوێندنی باڵای عێراقەوە نووسراوێک دەرچوو، کە تێدا ئاماژە بەوە کرابوو وەرگێڕان و وەڵامدانەوەی تاقیکردنەوەکان جگە لە زمانی عەرەبی لە زانکۆکانی کەرکووک، نەینەوا، دیالە قەدەغەیە، ئەمەش کاردانەوەی زۆری بەدوای خۆیدا هێنا.

بڵاوکراوەی فەرمی: د. شاخەوان عەبدوڵڵا، جێگری سەرۆکی ئەنجوومەنی نوێنەرانی عێراق ڕایگەیاند: ڕۆژی 26-7-2025، لەگەڵ نەعیم عەبوود، وەزیری خوێندنی باڵای عێراق لەبارەی ئەو نووسراوە قسەمان کرد، پێی ڕاگەیاندنین کە نووسراوەکە کاری پێناکرێت.

- وەزیری خوێندنی باڵا وتی، ڕێز لە زمانی کوردی دەگرم، ئەوەی کراوە لەناو کۆمەڵێک ڕاسپاردەی وەزارەت بووە.

- پەیوەندیم بە سەرۆکی زانکۆی کەرکووکەوە کرد، پێم وتن کە بڕیارەکە هەڵوەشاوەتەوە و ڕێنماییتان لەوبارەیەوە لەلایەن وەزارەتی خوێندنی باڵا پێ دەگات، سەرۆکی زانکۆش وتی 'بەگوێرەی ڕێنماییە نوێیەکەی وەزارەت کار دەکەین، کار بە نووسراوەکە ناکەین'

- ساڵی 2024یش بڕیارێکی هاوشێوەمان ڕاگرت، قوتابیان دڵنیادەکەینەوە کە دەتوانن بە زمانی دایک وەڵامی تاقیکردنەوەکان بدەنەوە.