هەواڵ و چالاکییەکانی ئەفغانستان بە کوردی  بڵاودەکرێنەوە

ئاڤا نیوز

هەواڵ و زانیاری و چالاکییەکانی حکومەتی ئەفغانستان لەرێگەی ئاژانسی باختەر، بە زمانی کوردی، شێوەزاری سۆرانی بڵاودەکرێنەوە.

وێنە گەورەکە: ئاژانسی هەواڵی باختەر (BNA) تاکە دەزگای هەواڵی فەرمی حکومەتی ئەفغانستانە، لەلایەن ئاژانسی ڕۆژنامەوانی حکومەتی ئەفغانستانەوە دامەزراوە، ئاژانسەکە بارەگاکەی لە کابولە و بە سەرپەرشتی وەزارەتی ڕاگەیاندن و ڕۆشنبیری کار دەکات، بە سەرچاوەی سەرەکی هەواڵ بۆ دەزگاکانی ڕاگەیاندن لە ناوخۆ و دەرەوەی وڵات دادەنرێت.

چیرۆکی سەرەکی: ئاژانسی باختەر ئاژانسی فەرمی حکومەتی ئەفغانستانە و نزیکەی یەک ساڵە هەواڵ و زانیاری لە تۆڕی کۆمەڵایەتی فەیسبووک و تیلیگرام بە زمانی کوردی شێوەزاری سۆرانی بڵاودەکاتەوە.

زانیاریی زیاتر: ئاژانسی باختەر لە 13-4-2024، لە تۆڕی کۆمەڵایەتیی فەیسبووک پەیجێکی تایبەتی بە زمانی کوردی شێوەزاری سۆرانی بەناوی ئاژانسی هەواڵی باختەر کردووەتەوە و لە 5-9-2024 گرووپێکی بە زمانی کوردی لە تیلیگرام کردووەتەوە.

ئەمەش بزانە: ئاژانسی باختەر، جگە لە زمانی کوردی، هەواڵ و چالاکییەکانی بە زمانەکانی داری، پشتۆ، ئینگلیزی، عەرەبی، ڕووسی، ئوردو، ئۆزبەک و چینی  بڵاودەکاتەوە.

ئەوەی پێویستە بیزانیت: هەرچەندە ئەو دوو پەیجەی فەیسبووک و گرووپ چاتی تیلیگرامە بەناوی ئاژانسی باختەر کراونەتەوە و هەموو هەواڵ و بڵاوکراوەکانی ئاژانسەکە بڵاودەکەنەوە، بەڵام لە ماڵپەڕی سەرەکی ئاژانسی هەواڵی باختەر ئاماژەیان پێنەکراوە.