شارەوانی سلێمانی: کەسوکاری شەهیدان دەتوانن هەموو جۆرە مامەڵەیەک بە زەوییەکانیان بکەن

ئاڤا نیوز

کەسوکاری شەهیدانی بەرگریی و فریاکەوتن لە سلێمانی، لە بەرامبەر وەرگرتنی زەوی نیگەرانن و دەڵێن ئەو زەوییانەی دراوە بە ئێمە، نە فۆڕم نە تاپۆ هیچی نییە، ناتوانین هیچ مامەڵەیەکی پێوە بکەین، بەرێوەبەری ڕاگەیاندنی شارەوانی سلێمانیش دەڵێت، دەتوانن هەموو مامەڵەیەکی پێوە بکەن.

چیرۆکی سەرەکی: ژمارەیەک خانەوادە و کەسوکاری شەهیدانی بەرگریی و فریاکەوتن لە سلێمانی زەوییان پێدراوە لە بەکرەجۆ، بەڵام وەک خۆیان دەڵێن ناتوانن هیچ جۆرە مامەڵەیەک بە زەوییەکان بکەن و وەک ئەوە وایە زەویمان پێنەدرابێت.

زانیاریی بەدەستهاتوو: ئەو هاونیشتمانیانە بە ئاڤایان وت، چەندین جار سەردانی شارەوانی و تاپۆی سلێمانیمان کردووە، ڕێنماییمان پێنادەن، تەنیا کۆدێکیان پێداوین، نازانین کۆدەکەش چی لێبکەین.

لێدوانی فەرمی: زەردەشت تۆفیق، بەڕێوەبەری ڕاگەیاندنی شارەوانی سلێمانی بە ئاڤای وت، "ئەو زەوییانە لەلایەن ئێمەوە دابینکراوە، دەتوانن مامەڵەی تاپۆکردنی بۆ بکەن. ئەوانەی فۆرمیشیان پێدراوە، دەتوانن مامەڵەی پێوە بکەن، بەڵام هەر زەوییەکی دیکە بێ پرسی شارەوانی دابەش کرابێت، هیچ جۆرە مامەڵەیەک نایگرێتەوە".