سەرۆکایەتیی کۆمار و حەشدی شەعبی هەواڵی خانەنشینکردنی فالح فەیاز ڕەت دەکەنەوە

ئاڤا نیوز

هەریەکە لە سەرۆکایەتیی کۆماری عێراق و دەستەی حەشدی شەعبی، ئەو هەواڵانەیان ڕەتکردەوە کە باس لە دەرکردنی بڕیاری خانەنشینکردنی فالح فەیاز، سەرۆکی دەستەی حەشدی شەعبی دەکەن و جەختیان کردەوە کە ئەو بەڵگەنامەیەی لەو بارەیەوە بڵاوکراوەتەوە "ساختەیە".

چیرۆکی سەرەکی: ئەمڕۆ لەلایەن چەند دەزگایەکی میدیایی ناوخۆییەوە بەڵگەنامەیەک بڵاوکرایەوە کە واژۆی عەبدوللـەتیف جەمال ڕەشید، سەرۆککۆماری عێراقی لەسەر بوو و تێیدا بڕیاری خانەنشینکردنی سەرۆکی دەستەی حەشدی شەعبی درابوو.

زانیاریی بەدەستهاتوو: سەرچاوەیەک لە سەرۆکایەتیی کۆماری عێراق بە ئاڤای میدیای ڕاگەیاند، "ئەو نووسراوەی بەناوی سەرۆکایەتیی کۆمارەوە بڵاوبووەتەوە کە باس لە خانەنشینی فالح فەیاز دەکات، دوورە لە ڕاستییەوە."

لەلایەکی دیکەوە: دەستەی حەشدی شەعبی لە ڕاگەیێنراوێکی فەرمیدا ڕایگەیاند: "هیچ ڕاستییەک بۆ ئەو نووسراوە ساختەیە نییە کە باس لە دوورخستنەوەی فەیاز یان خانەنشینکردنی دەکات."

لە هەمان کاتدا: دەستەکە داوا لە هاووڵاتییان و دەزگاکانی ڕاگەیاندن دەکات "مامەڵە لەگەڵ ئەو جۆرە هەواڵە ناڕاستانەدا نەکەن و زانیارییەکان تەنیا لە سەرچاوە فەرمییەکانەوە وەربگرن."