لە سوەیدا ئاماری کوژراو و برینداران بەرزبووەوە و ئاگربەست هەڵدەوەشێتەوە

ئاڤا نیوز

لە نوێترین ئاماردا، ژمارەی کوژراوانی تووندوتیژییەکانی پارێزگای سوەیدای سووریا لە 13ـی تەممووزەوە گەیشتە هەزار و 420 کەس، کە 250 کەسیان بە شێوەی مەیدانی کوژراون و لەنێویاندا ژن و منداڵ هەن. ئەمەش لەکاتێکدایە کە ئاگربەستە لەرزۆکەکەی ناوچەکە بەهۆی پێشێلکاریی نوێوە لەبەردەم هەڵوەشانەوەی تەواودایە.

چیرۆکی سەرەکی: ماوەی زیاتر لە دوو هەفتەیە شەڕ و پێکدادان لەنێوان دروزەکان و هۆزە بەدەوییەکان کە لەلایەن حکومەتی سووریاوە پاڵپشتی دەکرێن لە شاری سوەیدای سووریا بەردەوامە و تا دێت ئاماری کوژراوانیش ڕۆژ بە ڕۆژ بەرزتر دەبنەوە.

بڵاوکراوەی فەرمی: بەپێی ڕاپۆرتێکی ڕوانگەی سووری بۆ مافەکانی مرۆڤ، ئێوارەی شەممە گەڕەکە ڕۆژئاواییەکانی شاری سوەیدا لەلایەن 'هۆزە بەدەوییەکان'ـەوە بۆردوومان کراون، کە بە پێشێلکارییەکی ئاشکرای ئاگربەست دادەنرێت. هاوکات، هێزە ئەمنییەکان تەقەیان لەو هاووڵاتییە مەدەنیانە کردووە کە هەوڵیان دەدا ڕێگای 'سەعلە' بکەنەوە بۆ گەیشتن بە کێڵگە کشتوکاڵییە گەمارۆدراوەکانیان.

ژمارەکان وادەڵێن: بەپێی ئامارەکانی ڕوانگەی سووری بۆ مافەکانی مرۆڤ، خەڵکی ناوچەکە (678 کوژراو کە 145یان مەدەنین)، ئەندامانی هێزەکانی حکومەت (469 کوژراو)، و قوربانییانی بۆردوومانی ئیسرائیل. جەختکراوەتەوە کە 250 کەسن، لەنێویاندا 12 ژن و 8 منداڵ، بە شێوەی مەیدانی کوژراون.

لەهەمان کاتدا: ڕوانگەی سووری ئەم پێشێلکاریانە شەرمەزار دەکات و هۆشداری دەدات لەوەی کە نەبوونی میکانیزمێکی چاودێریی ڕاستەقینە و لێپرسینەوە، دۆخەکەی ئاڵۆزتر کردووە. هەروەها داوای پابەندبوونی هەموو لایەنەکان بە ئاگربەست و پاراستنی گیانی هاووڵاتییانی مەدەنی دەکات، لە کاتێکدا مەترسیی داڕمانی تەواوەتیی ئاگربەستەکە و پەرەسەندنی زیاتری تووندوتیژییەکان لە ئارادایە.